El músicu y escritor Maxi Areñes, que lleva décades nel ámbitu musical asturianu, ta acabante sacar discu nuevu. Falamos con él pa conocer el so trabayu, creáu nesti tiempu del andanciu de coronavirus, dende Areñes, en Piloña.
¿Cómo tas viviendo estos meses? A nivel creativu nun pares…
Bono, creando munchu material, nun sé yo si demasiao… A ver, o compones, escribes y grabes o acabes chifláu. La mio rutina nun cambió muncho, la verdá, nun soi una persona que salga de casa. Enantes salía esclusivamente pa dar conciertos o pa les presentaciones de llibru. Al médicu y poco más. Préstame sentir la seguridá de tar colos mios dientro casina.
Participesti nel #FormientuEnCasaFest con un conciertu, fixisti munches actuaciones y cuentacuentos dende casa, ¿qué tal la esperiencia virtual?
Foi perprestoso poder participar na primera edición del #FormientuEnCasaFest, y toi peragraecíu por ello. Nestos meses di dalgún conciertucu pa la xente dende l’estudiu de casa. Foi prestoso abondo. A min sirvióme pa ensayar temes nuevos y probalos con «públicu». Dende’l 16 de mayu toi cuntando un cuentín diariamente n’Onda Cero L’Infiestu, foi una suxerencia del collaciu Enrique Carballeira (pa min un auténticu xigante de la nuesa cultura) y la cosa ye que siguimos con ello. A la mesma vegada entamé a cuntar un cuentu o dos diariu a través de la mio muria de Facebook y creo que a la xente viéno-y bien. Ye una sensación perrara la de que te dean les gracies por esi momentín de 5 minutinos o menos, qu’intento allargar con dalguna pijaduca pa que la xente lo pase bien.
¿Qué tas escribiendo nestos momentos?
Agora mesmo, amás de cantares nuevos, tanto pa Fontoria como pa otres persones, tengo un llibru paráu (que retomaré dalgún día) y toi con otru en preparación. A raiz d’esos cuentos que faigo na radio, surdió la idega de facer otru llibru de cuentos. Sedría’l terceru xunto con «Cuentinos dende Areñes», «Suañando dende Areñes» y esti terceru que llevará’l nome de «Cuentinos dende la radio». Verá la lluz al entamu setiembre.
Tas acabante sacar al mercáu un discu, “Sones del tiempu que foi”, ¿qué destaques del trabayu?
«Sones del tiempu que nun foi» surdió de la necesidá creativa y económica, asina de claro. Fíxilu en 3 selmanes y media. Pillé testos de los mios llibros y musiquélos, metí dalguna cosuca más y un instrumental de 34 minutos. Creo sinceramente que ye un bon discu. A vegaes grabo muncha basoria (como toos, imaxino) pero cierto ye que toi mui arguyosu d’esti trabayu. Tuvi namás el sofitu de la mio pareya, Maitetxu Isla, y la nuesa neña, Nura. Metieron voces en dalgún tema. Y diéronme la idega de grabar «Margarideta», un tema tradicional y cuasi infantil de Catalunya. Prestóme pola vida. Tamos faciendo dellos vidios de los temes, el primeru foi’l de «Primavera n’Areñes», que tuvo realizáu enteru pola neña, que tien 13 años.
Tien unos soníos mui orixinales na música folk asturiana, ¿en qué estilu o estilos encuadres el discu?
Encuadralu ye difícil, en dellos temes vocales intenté dir un pasín p’alantre. Aproveché tolos medios que tenía, ten en cuenta que al nun poder cuntar colos músicos collacios por mor de la situación, llegué a tocar al rodiu de venti picu instrumentos. Ye folk, pero ye tamién munches otres coses camuflaes. El tema que da nome al álbum ye una suite de 34 minutos. Ye una especie de Folk Rock con tientes mui progresivos. Realmente fixi lo que me dió pola gana, trabayé con sintes de los 80, órganos de los 70, fixi toles coses que me presten. Lo bono d’esti discu ye que tien temes que pueden defendese con Fontoria perfectamente nun escenariu.
¿Esperes poder tar tocando pronto perhí?
Hummmm…Oxalá! Nun ta nada claro. Con Fontoria cancelamos tolo que teníamos (y yera munchu), nun sé, confío en que too quede estabilizao y podamos facer el nuesu trabayu. El segundu discu de Fontoria diba salir a lo llargo la primavera, con too esto saldrá a finales del branu. Toi mui preocupáu cola situación, muncho…
¿Cómo ves el sofitu institucional a la música n’Asturies, qué propondríes pa meyorar la situación de la cultura asturiana?
El sofitu institucional…??? Hai d’eso…? Mira, va trenta años, tábamos mal en milenta coses, pero tocábase munchu más qu’agora (pandemies aparte, dende llueu). Los músicos, sobremanera, siguen siendo ciudadanos de tercera o cuarta. Hai que facer daqué, hai que regularizar el gremiu. En dellos paises d’Europa hai modelos mui atractivos, Francia, por citar ún, fixo dalgunes reformuques qu’en comparanza colo que tenemos equí ye’l paraísu. Llueu ta’l tema de (como yo lo llamo) la mesa con cuatro banquetes, hai una mesa na que ves sentaos a los cuatro de siempres, eso tien que cambiar, nun se trata de quita-yos el so sitiu, trátase de poner más banquetes. ¿Sofitu institucional…?? Nun sé lo que ye, pero nel añu 1989 tampoco sabía lo que yera…Mira, una vegada entrugáronme nuna entrevista de radio, cuáles yeren, na mio opinión, les ferramientes necesaries pa entamar a abrise pasu nel cada vegada mas difícil «mundiu cultural» d’equí. Entós tuvi pensando un puquiñín la respuesta y dixi esto: Bono, la verdá ye qu’al principiu pienses que ye too cuestión de trabayu duru, una inversión pergrande de tiempu y perres y munchísima fe nos proyeutos que van surdiendo. Pero a midida que va pasando’l tiempu y vas conociendo’l percal, daste cuenta de que la meyor ferramienta y la que va abrite más puertes ye ser un bon «llambeculos». A ver, yo de momentu voi tirando cola fórmula del trabayu duru y lo de dir pasín a pasu, más entovía si yes consciente de que nun hai tantu culu pa tantísima llingua de trunfador como hai per ehí…
¿Cómo ves el futuru de la música asturiana nestos momentos, deprenderíamos la llección de valorar más lo que tenemos cerca?
Habríemos facelo, claro qu’habríemos, pero nun creo que vaya ser asina. Ye como esta pandemia, ¿fadrámos meyores persones…? El que yera bonu, sedrá bonu o entovía más. El que yera un castrón, seguirá siéndolo y más entovía. Colo nueso lo mesmo. La xente que ta investigando, recopilando y faciendo llabor, siguirá dexándose los cuernos, pero ensin el míticu «Sofitu institucional» vamos jodíos. Agora hai munches escueles de música tradicional, que ye una pasada. Va años, nun había, la xente buscábase la vida pa tocar un diatónicu, una gaita rabil o un bohdran. La xente mozo qu’entama tiénenlo muncho más fácil nesi sentíu. Pero lo que fai falta ye que dende les escueles de música tradicional fomenten la creación de grupinos. Eso ye básico pa que la nuesa música tenga una continuidá.
