Ediciones Trabe ta acabante poner nes llibreríes dos volúmenes poéticos nuevos, unu n’asturianu y otru en gallego-asturianu.
Reflexones d’un cuerpu opacu ye’l segundu poemariu d’una autora que llegó al mundu de la lliteratura asturiana pa traer aire nuevo. Si nel primer poemariu (Lliteratura interna, 2015) abondaben los poemes cortos y, en dellos casos, d’estructura clásica (sonetos), nesti qu’equí ufiertamos, tórnense llargos y los versos, llibres de rima y de cómputu, son el correllatu esactu d’un yo que va mandándose de la experiencia, del «ser discordante» qu’escribe.

Solinca Turbón Cuesta (La Felguera-Llangréu, 1981) ye llicenciada en Sicoloxía y máster en Xestión integral de la empresa. Diose a conocer nel 2015 cola publicación del poemariu Lliteratura interna (Premiu «Nené Losada Rico» 2014). Con Reflexones d’un cuerpu opacu foi a facese col Premiu «Fernán-Coronas» nel añu 2018.

Trenta y seis poemas forman Na palma da túa mao, primeiro poemario en gallego-asturiano de Conchita Álvarez Lebredo, escrito con llingua pulcra y xinxella en versos curtios que forman poemas de xeito, as máis das veces, narrativo y de llargor considerable. Este guapo poemario ta caltrido d’elementos materiales (a naturaleza y a vida cotidiana son ben importantes aquí), peró tamén de referencias lliterarias y d’úa ironía llixeira que se move entre el escepticismo y a señardá.

Conchita Álvarez Lebredo (Vigo, 1970) é profesora d’Enseñanza Secundaria na especialidá de Lingua Casteyana y Literatura. Ten publicaos artículos sobre lexicografía y folclore en galego-asturiano y mantén el blog A Salvadeira sobre ese mesmo tema. Tamén ten publicadas colaboracióis literarias na revista Trabatel, y nos libros conmemorativos Que nun se perda nel aire y Escritores asturianes. Antoloxía de testos n’asturianu y gallego-asturianu, editaos pol Goberno del Principao d’Asturias. Nel ano 2012 recibíu el Premio Victoriano Taibo de Poesía en lingua galega pol poemario Distancias e simetrías.

Artículos venceyaosMás del autor