L’autodidactismu foi en dellos casos la única manera que teníen les muyeres del pasáu d’acceder a los estudios. Un casu perconocíu foi, por exemplu, el de Sor Juana Inés de la Cruz, enxaulada nun conventu de Méxicu ensin guía pa los sos amados estudios. Y, ensin una tutela, les muyeres teníen que zarapicaer con trataos anticuaos, con datos irrelevantes o superaos, mientres que los homes caminaben ensin grandes obstáculos pola senda del conocimientu.
Claro qu’esti problema, qu’agora paez nun tener importancia nenguna, tenía los sos oríxenes na imposibilidá de les muyeres pa realizar el so llabor intelectual. ¿Quién nun se diba rir d’una muyer que quería más estudiar enantes que bordar o cuidar de la casa? L’espaciu de la muyer yera’l domésticu, les actividaes de la casa y les sos preocupaciones, les reproductives. Mentanto, los homes ocupaben la mayor parte de la actividá intelectual y de los espacios públicos.
Robustiana Armiño y Menéndez (Xixón, 1821 – Madrid, 1890) foi una d’eses muyeres autodidactes, dedicada al periodismu y a la poesía dende la so adolescencia. Ente los sos estudios autodidactes destaquen tanto’l perfeccionamientu de la llingua castellana como la conocencia d’otres llingües estranxeres cola única ayuda de los llibros. Publicó en periódicos como El Nalón, Revista Asturias, El Guadiana y El pensamiento, ganando un gran prestixu lliterariu y el so nomamientu como Socia Facultativa del Liceo de Badajoz y como socia de mérito corresponsal del Liceo de L’Habana.
A pesar de les dificultaes pa conciliar la so carrera lliteraria cola so vida doméstica tres el casamientu col doctor De la Cuesta Cherner, Robustiana Armiño ganó l’aprobación de los intelectuales del so tiempu. Cabe destacar la correspondencia qu’intercambiaba cola escritora d’Almendralejo Carolina Coronado, quien promocionaba les obres de les sos compañeres de lletres, y con Gertrudis Gómez de Avellaneda.
La so obra abarca munchos xéneros lliterarios. Dende’l so llabor como periodista, hasta’l so llabor como dramaturga. En poesía, destaquen el llibru Poesías (1851), prologado por Carolina Coronado, y el poemariu infantil Flores del paraíso o Ilustración de la Infancia (1852). Nel ámbitu narrativu, escribió noveles como La culpa va en el castigo (1864), Las virtudes capitales. Contra soberbia, humildad (1865), y un llibru de semeyes tituláu Fotografías sociales (1862). Por últimu, cultivó’l teatru con obres como’l drama Los condes de Gijón y la zarzuela Dos coronas.
Magar que la hestoria quiera borrar los nomes de les muyeres que con dificultá s’abrieron pasu nel mundu públicu masculín, la verdá ye que munches participaron activamente na esfera pública, faciendo frente a les consecuencies. Dalgunes, baxo nomatu. Otres, adaptándose a les circunstancies y otres dando la cara escontra les normes d’una sociedá que comenzaba a cambiar.
