«Berto Ríos», d’Inacio Rodríguez Solar

– Berto Rios. Operador d’información de nivel 15.

– Pase.

Soi Berto Rios, Operador d’Información nel campu de refuxaos Xixón 2. Agora voi camín d’un conceyu colos xefes d’estaya, pa conocer les nueves órdenes.

Yá veo a Fredo Álvarez. Un bon collaciu, de los primeros en llegar al campu conmigo. Perdió a tola so familia nos primeros díes de la invasión.

• Fredo pera que nun t’alcanzo.
• Pues apura.
• Enteréme de la incursión na to zona.
• Tovía nun lo quito de la tiesta. Perdimos otru más. Otra, más bien.
• ¿Una? Too ye muncho pero yá nun son les decenes d’a lo primero. Amás esta vegada furrularon los protocolos.
• Vamos ameyorando. Culesquier día tócanos a ún de nós, Fredo.
• Pa que nun la coyeran ún de los guardies matóla d’un tiru na tiesta.
• Cada vez que miro a los güeyos de la mio xente veo mieu y dolor.
• Los glayíos d’aquella probe nun soi a quitalos. Perdiere dos fíos y maríu xusto’l día enantes de llegar al campu.

La sala, non mui grande, asitiada na primera planta l’edificiu de servicios, tenía suelu de madera que-y un aire rústicu pero funcional. Fredo y yo sentámonos nuna de les últimes sielles. Xusto delantre taben tolos compañeros, dalgunos de les zones más peligroses del campu.

Alantre cola cara seria, taba’l comandante xefe del campu.

Respiré al comprobar que dende la sala nun se-yos sentía al otru llau les valles, aquel soníu día y nueche taba acabando colos nervios de munchos refuxaos.

• La situación anguaño ta estancada. Diz el comandante.
• Nun somos a avanzar pero tampoco perdemos tarrén como lo facíemos cuando too entamó, hai yá seis meses.
• Eso nun ye tou. Tenemos una bona noticia. El nuesu téunicu de radio consiguió contautar col campu de refuxaos de Bilbao.

Un murmullu espardióse per tola estancia. Había yá más de cinco meses que perdiéremos contautu col otru campu de refuxaos de Xixón, el de la Campa Torres. Presumíamos que cayere. Dir per mar a esplorar yera peligroso a esgaya, munches corrientes y peligros, nun tábemos pa perder más xente. Con cada perdida colaben conocimientos y saberes necesarios pa seguir sobreviviendo que ye a lo más que podíemos aspirar.

• La situación en Bizkaia nun ye mui diferente a la nuesa. El campu ta apegáu a la mar. Unes cinco mil almes viven toes apegutuñaes. La diferencia, ta aseguráu y recupérense cachos de ciudá.

Nel Xixón 2 había trés mil persones, ye tolo que quedaba de Xixón. La seguridá taba al cargu de dalgunos militares llegaos a lo primero dende Noreña, tamién había policíes llocales, nacionales y guardies civiles, toos cola moral en suelu y l’estómagu gatuñáu per dientro al alcordase que tuvieren de sacrificar la familia pa protexer al restu. Un guardia contaba ente llárimes lo que vió al llegar a so casa nel cuartel de Contrueces: restos ensangrentaos de la muyer y los fios, de trés y dos años, nada más quedaba en tola casa.

• Una bona noticia ye qu’esos vascos tienen un helicópteru. Lleváronlu pa evacuar al Lehendakari pero nunca llegó a usase, el Xefe Vascu desapaeció. Siguía falando’l xefe de campu.
• Amás tienen tropes bien armaes y adiestraes. Dixo amosando una sorrisa nos llabios.

Notábase allegría nos compañeros. Fredo y yo mirámonos ensin creyer muncho naquelles pallabres. A los dos meses del caos tamién nos dicíen que llegaríen barcos dende Inglaterra pa evacuar neños y muyeres pero naide llegó, namás un barcu pequeñu y tou furruñusu con dalgo de comida.

• Pa que lleguen eses tropes que yá tán ayudando en Santander fai falta un sitiu onde posar el páxaru.
• Pa esa operación van necesitase voluntarios. Ye mui arriesgada. Los zulus tienen el campu arrodiáu y en dalgunos llaos a piques de metese dientro.

El plan podía resumise mui rápido. El campu, enllenu refuxaos nun tenía sitiu pa posase l’helicópteru, había de facese sitiu. El Molinón diba ser la pista aterrizaxe. La nuesa misión yera: revisar y trancas les entraes, llimpialu de zulus y colocar señales. El campu fútbol, apegáu al Piles, tenía toles entraes trancaes pero según delles informaciones dientro quedaba dalgún qu’otru cabrón, con non sanes intenciones.

• Da-y Fredo. Fuerte. A la tiesta.

La tiesta d’aquel fiu de perra fizo un ángulu pel aire dexando detrás un rastru sangre. El zombi cayía fulmináu al suelu, col sangre a golfaraes saliendo d’onde taba la tiesta. Maldita la hora que mos ofrecimos voluntarios, aquello taba enlleno cabrones esfamiaos, yera la tercera vegada que salimos pelos pelos.

• Cuidáu cola puerta esa. Nun quiero más sustos.
• Sustu’l que teo nel cuerpu. Toi sudáu enteru. Falaba sele. Los ruios atrayíen a aquellos cabrones y nun sabíemos lo que taba al otru llau de la puerta.
• Fredo, abre cuando te diga. Tate al tantu.

Llevanté l’hachu dispuestu a cargame lo que fuere a salir. Yá sabíemos que facer, derecho a la tiesta.

• Fredo.

Fredo cola mano sudorosa xiró la maniella y abrió de golpe la puerta los vestuarios, d’ellí al campu nun podía llevanos muncho.

Aguardamos, nun se sentía nada, nengún ruiu. Pasé delantre, con cuidáu y atentu a esos requexos escuros de les esquines, ún podía salinos en cualesquier momentu. Avanzabamos siguiendo la feble lluz que llegaba del esterior, yá tábemos cerca’l campu. Detrás sentía’l respirar asustáu de Fredo, nunca mos dixeron que’l mieu se metía adientro como’l fríu.

De sópitu y nun se d’onde, salieron trés d’aquelles coses. Yeren dos homes y una muyer. Avanzaben pasiellu alantre, despaciu, ensin parase. Otra vez sentí aquel sudu fríu y húmedu, los músculos tensáronse y punxi l’hachu llistu pa tarazá-y la tiesta a quien se punxera delantre.

Miré de regüeyu a Fredo y pudi sentir que taba más asustáu que yo. Yeren trés escontra nosotros dos, anque armaos tábemos cagaos de mieu. Si mos mordíen o arañabaen, yá sabíemos lo que mos quedaba, vagar perhí a la gueta comida, daba lo mesmo perros que gatos, que paisanos.

De sutrucu dexé de sentir l’aliendu de Fredo. Asustáu, xiré y vilu, un cachu zombi, namás troncu, brazu y tiesta coyía pola pata a un Fredo blancu como la ñeve. Llevanté’l hachu y d’un golpe taraze-y el brazu, dempués la tiesta, aquello dexó de ser problema.

Entos sentílo, unes manes fries y dures como l’aceru d’Ensidesa ficieron presa en min, nun sé cómo, la muyer corrió más y yá taba enriba, les mandíbules averábense peligrosamente al gargüelu.

Xiré, revolvíme como los aguarones cuando se ven acorralaos y d’un puñetazu salió la Non Muerta disparada p’atrás, dos zapicaes y cayó en suelu a los pies de los otros dos castrones que veníen detrás, ún d’ellos zarapicó cola muyer y entos aproveché pa d’un golpe mete-y un fierru nel estómadu, aquellos cosos nun aparaben de sorprendeme, seguía caminando col fierru pasandolu de llau a llau.

• ¡¡Fredo!! Polo que más quieras. Échame un gabitu. Grité ya desesperáu.

Entós Fredo reacciono, tiróse enriba del que quedaba y cayeron rodando los dos xuntos, el golpe foi escomanáu, matose pensé, pero non. Fredo llevantóse con tola ropa enllena sangre podre y entós vilo, el castrón taba en suelu cola tiesta colgando a un llau. Fredo sacando fuercies de la vida coró al zombi como si fuere un pitu.

Yá namás quedaben dos, la muyer arrastrábase pel suelu colos brazos estiraos y ximiendo, l’home había perdió l’equilibriu pol fierru y taba faciendo palanca escontra’l suelu, aquella barra taba pasándolu como una pinchu morunu. De la muyer ocupéme col hachu, los güesos del pescuezu al dixebrase ficieron un ruíu, como’l de la lleña al partilo. Fredo ensin pensalo, arrancó la motosierra que llevaba na mano y cortó de riba a abaxo al zombi que quedaba.

Mirámonos, respiramos aliviaos y punximos la vista nel campu. L’helicopteru yá tenía sitiu pa posase.