Tema 0: Obertura
Les últimes rayaes allumen sele los vieyos castaños d’un campu d’horizonte infinitu. Un regatu percuerre’l monte. Llibre… Llibre y cansáu d’interpretar una melodía que yá naide sabe escuchar. Una simple y guapa sinfonía qu’anubre toos y caún de los requexos d’esta cúpula de viesca. Una fueya amarellentao y vieyo entama dirixío pola nidia oral del atapecer hasta cayer al ríu. La fueya déxase llevar baillando al son de les agües intentando consolar al eternu músicu del monte. Los dos baillen y baillen ensin importar el porqué, inorando que llueu la nueche visitarálos.
Adulces, el sol desdibúxase tres los montes y dexa pasu a la lluna; a la dama blanca que protexe la nueche.
Un pequenu senderu paez surdir al pie de la vera del regatu. El camín remata nun claru nel monte onde s’atopa un vieyu molín en ruines, una vieya cabana y un fondu pozu del que paez surdir lluz propia. Un brillosu fexe de lluz surde d’él travesando y allumando’l cielu nocherniegu. Del so interior empiecen a salir pequenos rellumos y, de sópitu, millones de lluciérnagues esnalen como fades pente les piedres. Elles salen, afalaguen les fueyes y como si tuvieren el control del vientu, faen mover les aspes del abandonáu molín y xúnense al son de la fueya y el ríu.
Tema 1: La Lluna de Lindarbarca
La bóveda celeste dexa ver el so universu. El monte duerme. Nes cañes de los árboles, les curuxes, guardianes estátiques de la silenciosa nueche, reparen cómo la pálida lluz de la lluna peñera ente los parrotales proyectando solombres tenebroses sobre la fría roca. De secute, un misteriosu silenciu acúrrese sobre’l monte. Al fondu y de lloñe, nos montes, acolúmbrase la llapada d’una foguera.
Avérase una gran nube. El vientu azota un pequeñu pobláu cutiendo los afataos postigos de madera de les cases. Un finu orbayu empieza a cayer sobre’l camín que llueu se convierte nuna llamuerga y una trupa gurriana cola ente les cabanes.
Un desgarrador aullíu ruempe l’ensordador silenciu de la nueche y la nube. Óyense triaes averándose. Lo que paecía un solu llobu, ye agora tou un exércitu d’ellos. Cientos de menaes apaecen ente la gurriana como guerreros. Almes d’homes que perecieron na batalla. Homes que llucharon y nun quixeron ser recordaos. Homes qu’agora tornen al so llar pa ver una última vegada a les sos families.
Amodo, los llobos emburrien col focicu les puertes de les cases. Unu d’ellos entra nuna cabana. La lluz de la lluna cola ente les ventanes. El llobu avanza per un pequenu pasiellu hasta llegar a un cuartu onde s’atopa una moza dormiendo y suañando quiciabes que’l so home torne de la guerra y abrazase na tenebrosa nueche. El llobu queda quietu y sentáu sobre les sos pates traseres reparando a la muyer. Y asina lo fai’l restu de la nueche, ensin estremar la mirada hasta que les primeres rayaes empiecen a surdir de nuevo pel este intentando recordar lo qu’un día foi una vida al so llau.
Tema @2: La Buelga del Llobu
L’aire dexó de soplar. La nube alloñóse. El sol de la mañana vese reflexáu na rosada de la yerba y el cantar de los páxaros anuncia’l fin de la nueche.
El pobláu cobra vida. La xente trabaya les güertes, caten la lleche de los sos ganaos y nel llavaderu siéntense rises y una amena conversación. Na tabierna, una nueva y el so padre preparen el negociu pa los primeros veceros de la mañana. Una serie de tenderetes coloríos afaten la plaza mayor. Ye día de mercáu. Un xiblateru toca sentáu nun bancu a les puertes de la ferrería intentando siguir el ritmu de la incla que resona de lloñe.
Nel mercáu atópense toa serie d’espaes, armadures, ropa ya instrumentos de llabranza y d’usu cotidianu.
Pela rodiada, el ríu sigue’l so cursu so una ponte del que cuelga una cortina vexetal que la peña. Tres él, l’estrechu y angostu escobiu escontra los montes.
Tema @3: Amanecer
Dos xigantesques efixes curien la caleya foliada yá pol pasu del tiempu. Un grupu d’utres sobrevuela’l pocu cielu visible dende’l fondu del escobiu. El camín avanza complicàu ente les enormes parees como si dirixiéramos al mesmu avernu.
El camín tórnase cada vegada mas estrechu hasta enfusase nun gran covarón allumáu solo por un pequenu furu pol qu’enfusa la lluz del brillosu sol. La claridá reflexada na paré amuesa tou un tapiz de símbolos y escenes de caza dibuxaes na roca. Este ye’l reinu del silenciu. Solo’l ritmu de les gotes d’agua ruempe l’afonía del vacíu. Miles de voces paecen surdir de les pintures. Son les voces de los ancestros.
El senderu álzase dexando atrás la cueva. Unes escaleres escavaes na roca xuben pol colosu de roca. El vientu sopla fuerte ximelgando les cañes de los enrevesaos árboles fondiaos al monte. D’ellos cuelguen cintes de tela que se ximelguen al vientu.
Adulces, les escaleres algamen el visu del monte y nella, una despoblada cabana de madera. Na so fachada, miles de cazos topeten ente si emburriaes pol airón creando un mantra que s’asemeya a un millón de campanes sonando en perfecta harmonía. Dende’l llugar repara tola enllanada. Los verdes campos, el vieyu monte, el pobláu…Y al fondu, tou un mar de nubes que s’estienden escontra otres tierres… Escontra otros suaños. Nel interior de la cabana ta un vieyu sentáu nuna siella. Les parés amorticen la guapa composición del vientu. Na chimenea, una pota fierve. Na paré, un cuadru, y nél, una alta chimenea asoma ente unes cais de pintoresques cases soportalaes. So elles, la xente camina protexéndose del orbayu. El vieyu atópase ausente y esteláu mirando fixamente la imaxe.
De sópitu, l’home consigue articular unes pallabres. Llar.
