El preciu de la gasolina de magar 2012 entamó a xubir n’escala xeométrica, colo que les más de les persones renunciaron a los sos coches, y cuando’l llitru d’ensin plomu 95 escomencipió a rondar los 10 euros yeren yá bien pocos los particulares qu’emplegaben los sos vehículos personales y los más de los viaxes facíense en tresportes colectivos escasos y caros, pese a les fuertísimes sovenciones estatales.
Paralelamente a esto fueron desenrollándose grupos de persones que reivindicaben l’usu del coche propiu pese a tolos pilancos, los tuneros negábense a dexar la so afición y constituyéronse, nun principiu n’“Asociaciones Culturales” que, a poco y a poco, fueron adoptando un carácter cuasi relixosu, entamando’l cultu al motor d’esplosión a la par que los precios siguíen xubiendo. Cuando’l llitru rondó los 20 euros los tuneros radicalizaron so postura, renunciando a la vivienda y durmiendo nel interior de los coches, cuando andaba ente los 25 y los 30 los sumos sacerdotes de la relixón del motor d’esplosión predicaron la purificación de los conductores de les sagraes máquines, dende esi momentu namás tendríen de beber agua de lluvia y comer sandwiches de máquina espendedora, guardando los más de los sos ingresos pa mercar la preciada gasolina.
Anguaño’l preciu del llitru de carburante muévese nún arcu ente los 47 y los 52 euros, colo que los tuneros siguidores de la relixón del motor, alloriaos dafechu dende va tiempu por mor de los contaminantes presentes nel agua de lluvia, radicalizaron les sos postures y dedíquense a asaltar a los pocos tresportes oficiales que circulen peles autopistes pa roba-yos el combustible qu’heba nos sos depósitos y xintar crudos a los sos conductores, queriendo iguar asina les ruines nutricionales nes que los sumió la desapaición de les máquines espendedores de sandwiches de les nueses cais.
El conseyu de ministros de güei va valorar l’emplegu d’armes nucleares contra les zones con escesu de tuneros.
