Yera sábadu pela nueche. Mino llevaba tola tarde preparándose pa salir y pensando la de coses que fadría pa pasalo bien. Quedara a les nueve colos amigos na cai mayor pa entamala.
Les tripes ruxíen-y de forma espantible. Aínda teníen de dir a cenar dalgo. Como siempres un bocadiellu, una hamburguesa, daqué de picar o culesquier cosa pa que les tripes callaren y diera entame la fiesta, el baile y los cubatas.
Mientres diba camín del puntu d’alcuentru alcordóse qu’esta selmana tocába-y a él pagar la cena. La cena de los siete amigos nun solía pasar de los quince o venti euros. Mientres a llargues zancaes s’averaba yá a onde los amigos lu esperaben, dio-y por echar un güeyu a la cartera. Esto fízolu aparar en secu. Tenía venti tres euros con cuarenta y dos céntimos na cartera. Esa cantidá nun-y daba marxe nin pa un triste cacharru dempués a nun ser que lu invitaren.
- Bono – pensó- qué se-y va faer. Tendrán d’invitame. Anque, ¡que guapo sedría atopar cincuenta eurazos! ¿eh, Minín?
Dos pasos más alantre y en metá de l’acera, tan dobladín como recién salíu d’una cartera, atopó un billete de cincuenta euros. Cambió-y la cara, la espresión y fasta blancu púnxose del sustu. Gachóse por él y mirólu bien. Nun yera nin de pega nin de publicidá; tenía la marca d’augua y la banda de seguridá. Nun había dulda: yera bonu. Cuando llegó, la cara d’allegría que trayía nun sorprendió a los amigos pola mor de que Mino yera gayoleru y folixeru a esgaya.
- Llegues tarde.
- Siéntolo. Pero tuvi d’aparar a por perres. Amás güei invítovos a cenar a lo grande. ¡Vamos!
- Tranquilu, Roquefeller, que nun yes l’últimu. Xuan aínda nun llegó.
El corru enanchóse, Mino entró nél y punxéronse a falar de cómo-yos fuere la selmana a caún. Ente batallines ya histories del trabayu, Mino dedicóse a lo suyo: A planificar la nueche.
- ¡Oxalá Xuan venga pronto! Y si viniere con Marta, la so hermana, meyor que meyor, que ta bien buena – pensó Mino.
Dicho y fecho. Namái acabar de pensalo apaeció Xuan con cara de pocos amigos y con Marta al llau.
- Espero que nun vos importe cargar con esti pesu muertu.- soltó’l mozu- Empaquetáronmela mios pás que diben pehí. En cuantes atopemos a les tos amigues yo nun quiero vete más. – Dixo dirixéndose a ella.
- Taría yo encantáu de cargar con ella- pensó Mino pa sí mesmu.
- A lo meyor nun quiero dir coles amigues- retrucó Marta en tonu burlla y enganchándose del brazu de Mino.
- ¡Mi madre, vaya nueche!- Glayó Mino llevantando la tiesta y mirando pal cielu como dando les gracies.
- Siéntolo, colega.- Faló Xuan, camentando la putada que-y acababa de faer la so hermana al amigu.
Cenaron de maraviella. Prestó-yos enforma too. Y cada cosa que pasaba, anque fore llixeramente, pela cabeza de Mino convertíase en realidá. Pensó no bono que sedría que se-yos escaeciere nel chiringu cobrá-yos les bebides pa que la cena saliere más barata y estirar los cincuenta euros, y asina foi.
Disfrutando col final del partíu que poníen na tele del chigre, pensó lo bono que tenía de ser que perdieren los tercer clasificaos pa da-y pasu llibre al equipu qu’él siguía con afición, y asina foi.
Pensó, más llueu, en toes y caúna de les canciones que diba bailar con Marta esa nueche y una tres otra fueron sonando na discoteca. Pensó en cómo diba encandilala, no melgueru que diba ser con ella y en cómo ella diba a comé-y el cuellu a besos aquella nueche. Pensó no emocionante de lliase con ella, no prestoso y xabaz d’un polvu nun portal a escures, lo escitante de qu’ella-y lo pidiere too y de que ficiere exautamente lo qu’él quería.
Pensó na mangada pergrande de los sos collacios que nun se diben enterar de nada y too foi pasando. Yá nun sabía nin que pensar. Tenía mieu de pensar delles coses. Pero la mente atrofiada cada vegada más pol alcohol y otres sustancies que s’animó a pensar que probaba, diben faciendo que nun fuere tan consciente de qu’absolutamente tolo que pensaba convertíase en realidá.
Dempués de dexar a Marta y a Xuan en casa (dicir que Xuan nun s’enterare de nada), coló con una sorrisa na boca pa casa un migayu más consciente del so don. Yera un home maraviella, un superhéroe; yera increyible, un triunfador. Tendría al mundiu rindíu a los sos pies en cuantes lo pensare. Y amás, sedría inmortal con solo pensalo, podría volar como un páxaru, cruciar caminando’l mar ensin fundir, prebar coches que nun vería nin en suaños, tar con muyeres de bandera, ver sitios que nunca naide nun vio, probar alimentos acutaos pa unos pocos, ganar perres ensin trabayar, comer como un gochu ensin engordar…
Al pasar penriba la ponte que cruciaba l’autopista de camín a la so casa, pegó un brincu y púnxose al otru llau de la baranda. Zarró los güeyos, abrió los brazos y saltó. Nesi momentu, mientres cayía llibre al vacíu y pensaba en volar, una gran dulda, igual qu’un rellumu, pasó-y pela tiesta y pensó:
– ¿Y si lo d’esta nueche foi too coincidencia?
