Cayíen les llárimes como fontes
pel perfil de los sos güeyos
qu’escatuñaben les solombres.
Pasaren tantos años, tantos soles,
que nin manes, nin memoria
nin fleches nos relós.
Acercóse’l nietu a entrugar:
-¿por qué llores, güela?-.
Dixo ella:
-Nietín:
Ye difícil topar un llobu
qu’allume la to vida
ensin facete suyu.
Qu’amolde’l so cuerpu al tuyu
ensin recelu dalgún.
Ye difícil,
cuando manda’l llobu,
alcontrar unu
que cuerra llibre
al to llau,
costazu con costazu.
Nun lloro color triste,
nietu,
si sé que’l to güelu enseñóte,
non a ser dueñu,
sinón siempre compañeru.
Como siempre foi él,
tan sensible, valiente.
Tan enteru.
Un espeyu pa suañar,
cómplice,
nel so reflexu.
