Alba Llaneza espubliza’l so primer poemariu “Galerna” con Ediciones Trabe. Un llibru que nos permite ver cómo ñaz la sensibilidá gracies a la pallabra y na que la llucha y la tresformación personal percuerren los 26 poemes del llibru. El llibru ta dividíu en dos partes (“Decayer” y “Rescamplar”) y dambos términos fúndense na idea global que se caltién a traviés del poemariu.
En Galerna combínense poemes y ilustraciones. Imáxenes que conformen un mundu oníricu de fantasía y sensualidá onde’l vientu y la mar son protagonistes. Ufrimos trés poemes del conxuntu.
NORTEÑA
Si pudiera cuntate que yes Norte
Norte
Norte bruscu d’intenciones fuertes
que se desfixeron igual que les gaviluetes
abandonen puertu pa topar
una sablera na que medrar.
Si pudiera cuntate qu’hai una ferida llatente
que suplica llealtá, y ye por eso
que s’atropellen –con infinita precisión de reloxeru–
nel calendariu colgáu na paré alcordances de nós,
trocinos de xelu que respingen el pelo.
Alcordances.
Cola vergoña derramada pel suelu
cola cayida del pacetible mieu,
la mio mano dibuxando na to espalda
l’húmedu trazu d’esa mansa batalla
l’últimu trazu d’esa mansa batalla.
Si pudiera cuntate que siento que tuvi
un migayu de Norte
Norte
Norte qu’escapó d’ente mios manes.
LA MAR
La mar perdida
La mar callada
La mar besada
La mar salvada.
Y los charcos de mios clavícules
enllenos de salitre.
Abrazada al vientu
fiende’l tiempu y l’espaciu
fráxilmente díxome:
yes una gota que rema
remasti nun ríu
rumbu la mar.
VERDUGOS NOSTÁLXICOS
Nós.
Verdugos nostálxicos.
Separtemos
la uña y la carne
la piedra y la yedra,
nesi periodu d’éxodu mayúsculu
respiro l’esbarrumbe
qu’escuende’l privilexiu minúsculu
onde atormentada l’ausencia
refuga, suplicante,
la promesa que fuimos.
