El nuevu númberu de Formientu y les obres de Diego Solís, Aida Escudero y Inaciu Galán ente les novedades pa esti 2019
Amás de nomes importantes de la lliteratura asturiana como Antón García, Marta Mori o Xuan Bello, ente les novedaes pa esti 2019 va tar el nuevu númberu de la revista de lliteratura moza Formientu, un de les espublizaciones más esperaes dende’l cambéu de dirección de la revista.
Pa esti númberu optóse por asoleyar una revista más pequeña y púnxose especial procuru n’aspeutos como’l cumplimientu de les normes, asina como nel estilu o les feches d’entrega. Opción que los/les encargaos de la codireición consideren importantes pa que los y les autores mozos garren vezos de cara a futures espublizaciones, anque siempres respetando les perspectives y criterios lliterarios de los y les creadores xóvenes.
Per otru llau, nomes conocíos de la revista asoleyen distintes obres lliteraries: el que fuera director de Formientu, Inaciu Galán va asoleyar el llibru de rellatos Cartes nel horru (y delles hestories más), al igual que Aida Escudero, va espublizar Esti llugar qu’agora ye nuesu (poemariu neanderthal), col que ganó’l XXIV premiu Fernán Coronas; amás l’actual codirector de la revista Diego Solís, va asoleyar Y el mundu marcha, la so primer obra completa n’asturianu.
