El Centru Sociocultural de Les Vegues, en Corvera, va acoyer esti xueves 17 de xineru a les 18 hores la primer sesión del Taller de Llectura n’asturianu del 2019, que va tener como protagonista a la escritora Vanessa Gutiérrez, autora de la obra que va ser centru de la sesión: El paisaxe nuestru.
Vanessa Gutiérrez (Urbiés, Mieres, 1980), ye una de les escritores más señalaes de la lliteratura asturiana última; ente la so obra, que bien en poesía bien en prosa apaez recoyida en distintes antoloxíes, hai que sorrayar títulos como Onde seca l’agua, La danza de la yedra (Premiu de poesía “Teodoro Cuesta” nel 2004), Les palabres que te mando, La cama o La quema, ente otros títulos más. Otramanera, tamién hai que sorrayar el so papel como profesional de la comunicación en medios como Les Noticies, la RTPA o El Comercio.
El paisaxe nuestru, obra cola que ganó’l Premiu Máximo Fuertes Acevedo d’ensayu nel 2016, ye una obra qu’afonda na memoria colectiva al traviés del contraste ente lo recoyío nes topografíes médiques escrites nel sieglu pasáu y entrevistes feches nesti sieglu XXI. Nesta obra combina l’usu de distintos xéneros lliterarios cola fin d’entender qué fuimos, qué somos y qué podemos ser nel futuru, construyendo un diálogu colectivu qu’en palabres del escritor Xuan Bello constitúi un “espeyu estraordinariu del alma humana”.
El Taller de Llectura n’asturianu desarróllase en collaboración col área de Cultura del Conceyu de Mieres y cola Dirección Xeneral de Planificación Llingüística y Normalización del Principáu d’Asturies, y ye impartíu pol técnicu responsable del Serviciu de Normalización Llingüística de Corvera, Rafael Rodríguez Valdés.
