La Xunta Directiva de l’Asociación d’Escritores d’Asturies reunióse’l pasáu día 2 de payares de 2021, onde alcordó, por unanimidá, conceder el XVI Premiu de les Lletres d’Asturies a la filósofa y escritora Amelia Valcárcel.
Amelia Valcárcel, catedrática emérita de Filosofía Moral y Política de la UNED y autora d’una montonera de publicaciones de prestixu traducíes a dellos idiomes, amás d’una brillante trayercotria académica y de los munchos y altos nomamientos, la so valentía y la so actitú combativa, rompedora siempres y comprometida, ensin tregua, col feminismu de la igualdá y tolos sos derechos, un feminismu enxamás entendío como inquisitorial, sinón como tradición de llucha pacífica. Y reconoz que tanto’l so nome, el so pensamientu y la so dialéctica directa y ensin tabúes, trespasen llendes y xeneraciones. Figura clave de la Cultura y de les Humanidaes, mesmo que reivindicativa, apuesta, dende un principiu, pola paz, integración, tolerancia y la posmodernidá y defende que negún individuu de la especie humana ha ser escluyíu de cualesquier bien y de nengún derechu por mor del so sexu, yá que ser feminista ye otra cosa: ye pensar normativamente como si’l sexu nun esistiere.
Amás, la Xunta Directiva alcuerda otorgar una mención especial a los escritores (socios) finaos esti añu: Xosé Bolado y José Herrero.
