Ediciones Trabe asoleya dos novedaes na Selmana de les Lletres Asturianes

Allumamientu ye una obra de gran orixinalidá temática, na que l’autor fai una fonda y personal reflexón al rodiu la paternidá, esperiencia nueva pa elli y mui emocional. Pablo Texón déxanos ver nestes composiciones la facilidá cola que ye a remanar distintos ritmos y estilos en poemes que van de lo popular (añada, blues) a lo visual, ensin escaecer les influencies d’autores como Raymond Carver, Sylvia Plath o Emily Dickinson. El resultáu ye un poemariu qu’emociona y estremez, que fai repensar la vida, sentila tan fráxil y débil, tan igual, tan distinta, tan única y, por embargu, repetida.

Pablo Texón Castañón (Felechosa, Ayer, 1977) ye poeta, narrador, articulista y traductor de reconocíu prestixu nel mundu lliterariu asturianu. Tien publicaos los poemarios Toles siendes (Premiu «Nené Losada Rico» 2003) y La culpa y la lluz (Premiu «Teodoro Cuesta» 2006) y el volume de cuentos Catedral. Nel 2017 recopiló tola so poesía en Media vida. Poemes y cantares. Como traductor dio a imprenta la versión asturiana de Xulia, d’August Strindberg (2007), y ye responsable de la selección y traducción de la poesía de Raymond Carver recoyida n’Un corte de pelo (2013). Collaborador en dellos diarios d’Asturies, ye, amás, lletrista de grupos musicales y cantautores asturianos (Dixebra, Verdasca, Alfredo González, Toli Morilla). Esti vienres va ser recibíu como nuevu miembru de l’Academia de la Llingua Asturiana.

Los llazos coloraos ye un percorríu peles fuelgues de la minería asturiana comprendíes ente los años 1957-1965 (dende la primer fuelga xeneral nel Nalón, pasando pela fuelga de 1962 que s’estiende a mediu país, hasta los asaltos a la Comisaría de Mieres y al edificiu del sindicatu vertical en Sama) y cómo, a lo llargo d’esos años, les fuercies obreres fueron modulando diferentes estratexes de respuesta a cada nueva forma de represión que les autoridades exercíen a cada convocatoria de fuelga: destierros, tortures, despidos…

Como diz Ignacio Peón nesti cómic: «Yeren fuelgues que fueron siguíes. Cada añu celebrábemos l’aniversariu de la fuelga anterior. Lo que pidíemos nun mos lo daben, asina que casi podíen valir les mesmes octavielles d’un añu pa otru». La escusa pa esti viaxe son les trayectories vitales de dos muyeres, Anita Sirgo y Tina Pérez. Les dos tuvieron una infancia mui difícil; la dictadura robó-yos el crecer xunto a los padres y madres, pero elles, sobreponiéndose a toles dificultaes, llegaron a convertise en símbolu internacional de la llucha poles llibertaes. Qué sabía la culiebra del facismu miserable qu’en cada llatigazu que daba col rabu diba dexando la tierra abierta pa que los estandartes nacieren. Nestos tiempos paez que quier volver la culiebra a poner los güevos y España sigue ensin reivindicar a esa parte de la población que dio la vida pola democracia. La vida y acciones d’estes muyeres y d’otres munches persones nun s’estudia nes escueles. La democracia española, si esiste, ye una democracia estúpida, una democracia mala. Cuando nun hai ruptura y sólo hai reforma d’una dictadura… el nial de la culiebra sigue intactu. Aquella Asturies que yá quedó atrás tien fama de que foi una tierra rebelde. Pero naide s’acuerda nin de los fechos nin de les feches, del orde de los acontecimientos, de los y les protagonistes… Ye un olvidu aguiyáu polos poderes pa convencenos de qu’hubo una vez un rei que traxo una democracia…

Alberto Vázquez García ye autor de dellos documentales sobre’l movimientu obreru asturianu y l’exiliu republicanu:
• 1962. La lluz que vino del corazón de la tierra.
• 1965. Asaltu a la comisaría de Mieres.
• La llucha de les muyeres (Muyeres antifranquistes de Mieres).
• La llucha de les muyeres obreres nos barrios de Xixón.
• 1934-1945. Diez asturianos nel exiliu francés.
Como dibuxante trabayó en La Nueva España y en diferentes publicaciones del sindicatu Comisiones Obreres y ONGs como Soldepaz-Pachakuti.