La editorial Impronta ta acabante asoleyar Tres beyuscos, la segunda novela de Sidoro Villa, dempués de la orixinalísima A estaya, que mereció les meyores crítiques y el sofitu de los llectores. Vuelve afondar equí l’autor na so personal mestura ente comedia y drama. Rescampla tamién l’humor negru, por cuenta d’una escapada de risión, pero van enriestrándose nel rellatu munchos más ingredientes.
Nun falta’l simbólicu atropellu d’un ser inocente —a manes del discutible progresu ferroviariu astur— y el maxistral remate marcáu pola presencia dominante de la naturaleza, nesti casu los beyos y cambriales del conceyu de Ponga. Con too y con eso, Tres beyuscos ye amás una emocionante novela d’amor, protagonizada por unos cuantos perdedores, nel contestu d’una Asturies onde namás la mesma naturaleza va ser quien a devolver l’orde verdaderu a les persones y a les coses. La naturalidá del rexistru llingüísticu, marca de la casa de Sidoro Villa, fai que domine tamién como naide los retratos de calteres, les descripciones y los diálogos.
Sidoro Villa Costales (Lieres, 1962) ye profesor de primaria, ilustrador y escritor. Atendiendo pa esi ámbitu, tien espublizaos dellos llibros infantiles y xuveniles: Llibru de los suaños (2007), ¡Nun-yos tengas perceguera! (2006), Mael al debalu (2010), Evaristo Valle, el pintor del antroxu (2011). Debutó como novelista con A estaya (Impronta, 2016), onde l’allegría y el bon xuiciu intenten nun se fundir braciando ente foles de soberbia y de maldá, nun escenariu apocalípticu de vallines fonderes y bastiazos nel que la naturaleza, omnipresente, algama un papel protagonista.
