En California los años trenta del sieglu XX tuvieron marcaos por una retafila de güelgues campesines nes que participaron decenes de miles de güelguistes. Por casu, nel 1933 produciéronse trenta y siete güelgues, nes qu’en ventinueve d’elles los y les trabayadores llograron victories, y venticuatro de les mesmes llideróles la CAWIU, el sindicatu comunista. Una d’estes güelgues inspiró ‘En llucha incierta’, novela que se publicó nel 1936, el mesmu añu que la xusticia disuelve la CAWIU por «antiamericana».
Los protagonistes d’esta obra son acusaos de ‘radicales’ y lo cierto ye que sí son «rojos», porque busquen que los pañadores de mazana trabayen con solidaridá y en defensa propia, porque ye na esperiencia del conflictu onde los xornaleros van deprender la importancia de too ello. Apenes hai romanticismu nestes páxines yá que nes cuatrocientes que conformen el llibru los protagonistes van tener que s’enfrentar a amenaces, traiciones, detenciones, cuelmes, quemes y asesinatos.
Naide nun escribe de les condiciones de vida -nin de los conflictos- de los trabayadores subsaharianos que se dediquen a pañar, esbillar y llimpiar a mano la mazana destinao a facer sidra nos llagares d’Asturies; sicasí, Steinbeck escribió d’esta novela pa contanos lo que-yos pasaba a los que lo facíen en California.
Retratu del poder y de la dignidá de la clase trabayadora y crónica d’una llucha dacuando amarga y desesperada que se describe con intensidá y emoción, ‘En llucha incierta’ ye una de les noveles más polítiques, desconocíes y interesantes de John Steinbeck. La obra pue mercase al traviés de la web de la editorial y na Llibrería Trabe, mesmo qu’en cualquier llibrería d’Asturies. Ye una traducción de Daniel Garcia Grande, autor que yá ficiera el mesmu trabayu n’obres d’otros autores como a autores como Kenneth Rexroth o John Berger.
