Gonzalo Barreñada ta acabante facese col XXXI Premiu Teodoro Cuesta de Poesía, lo que lu reafirma como unu de los poetes de referencia de los últimos años, tres ganar en 2019 con El llar n’orde, el Premiu Xuan María Acebal de poesía y el Premiu de la Crítica d’Asturies.
El xuráu del Teodoro Cuesta aconceyó na na Casa de Cultura de Mieres el día 2 d’avientu a les 18 hores y tuvo integráu pola filóloga y trabayadora xubilada de l’Academia de la Llingua Asturiana, Pilar Fidalgo Pravia, la escritora Montserrat Garnacho Escayo, el poeta Milio Ureta Soto, como ganaor de la última edición del premiu, l’escritor Pablo Rodríguez Medina, como representante de l’Academia de la Lingua Asturiana, y Esther Prieto Alonso, repesentando a Ediciones Trabe; actuando como presidenta del xuráu Ana Belén Alonso, Conceyala d’Educación y Normalización Llingüística del Conceyu de Mieres, y como secretaria Luisa Suárez Sáez, técnica de normalización del Conceyu de Mieres.
Presentáronse anguño 12 poemarios, d’ente los que’l xuráu decidió por mayoría conceder el XXXI Premiu Teodoro Cuesta de Poesía al tituláu “Cartes al treslluz” presentáu embaxo’l alcuñu Lord Holland, qu’abierta la plica resultó ser Gonzalo Barreñada.
Gonzalo Barreñada ñació en Sotrondio en 1973, ye llicenciáu en Xeografia y Hestoria pola Universidá d’Uviéu y tien dellos llibros de poesía y narrativa asoleyaos, asina como collaboraciones en revistes lliteraries.
El Premiu Teodoro Cuesta ye unu de los más prestixosos de la poesía n’asturianu y ta dotáu d’un premiu de 4.000 euros, amás de contemplar la posibilidá de promover la espublización del poemariu. Convocáu dende 1991, ente los ganadores atópense nomes reconocíos como Berta Piñán, Xuan Bello, Marta Mori, Pablo Rodríguez Medina, Marisa López Diz o Chechu García y Martín López-Vega.
