15 años pasaron yá dende que Formientu, la revista lliteraria n’asturianu pa xente mozo, entamara la so andadura. A lo llargo d’estos años pasaron dellos y delles autores qu’agora formen parte de la hestoria de la lliteratura y qu’entamaron les sos publicaciones en dalgún de los 18 númberos que Formientu tien espublizaos.
Pa celebrar esti decimoquintu aniversariu, Formientu va facer un alcuentru en La Revoltosa (Cai Juan Alonso, 12, Xixón), un abellugu lliterariu y d’ociu que tamién ta d’aniversariu, pues yá fai 9 años dende qu’abrieren les sos puertes.
Esti vienres, 9 d’avientu, a les 19:00 hores, Formientu y La Revoltosa, en comuña, celebren los sos aniversarios con un alcuentru nel que van tar dellos y delles autores presentes en dalgún momentu de la trayectoria de la revista, como por casu Alba Llaneza, Alma Hidalgo, Raúl Alonso o Nicolás Bardio. Al mesmu tiempu, Formientu convida a tolos autores a participar nesti actu.
Tamién van tar presentes los sos directores, Claudia Elena Menéndez y Diego Solís. Amás, esti últimu va tar presentando y roblando nel descansu del recital mozo la so nueva obra lliteraria, Volvemos en 6 minutos, espublizada nesti 2022 con Cuatro Gotes Ediciones.
