El xuráu del Premiu «Pepe Campo» de monólogu n’asturianu, na so edición XVIII, aconceyó esti llunes 23 de mayu en Morea pa determinador el resultáu de la convocatoria del 2022.
El xuráu d’esti concursu convocáu pola Sociedá Humanitarios de Samartín tuvo conformáu esti añu por Pablo Xuan Manzano, Ánxel Álvarez Llano, Octavio Trapiella, y la ganadora de la edición cabera, Aymara González Montoto, y decidió da-y el premiu al testu «Nel tiempu l’andanciu», que resultó ser d’Inaciu Galán.
Xunta del xuráu del Pepe Campo 2022.
Inaciu Galán ye habitual d’esti premiu, que ganó en delles ocasiones, la cabera nel añu 2018. Esplicó a Formientu.com les sos sensaciones tres conocer la noticia: «Lo cierto ye que ye un concursu al que-y tengo munchu ciñu, porque en 2006 foi unu de los primeros que llogré y porque me presta muncho l’anteción que-y dan los Humanitarios a un xéneru munches vegaes desprestixáu, pero que foi espaciu de continuidá pa la visibilidá del asturianu nel ámbitu públicu, ye d’agradecer qu’esta sociedá siga faciendo esti llabor qu’afala a los y les escritores a trabayar esti xéneru de gran tradición nes lletres asturianes y ésitu social n’Asturies».
Sobre’l testu del monólogu, Galán esplica que ta «pensáu pa la representación y que toca en clave d’humor tolos tópicos de les vivencies que tuviemos nel confinamientu pol andanciu de covid na primavera del 2020, con una vista que’l tiempu pasáu permite yá tocar dende l’humor, porque dio pa muncho».
Inaciu Galán (Xixón, 1986) Periodista, profesor y escritor, ye autor de dellos llibros de narrativa, poesía y lliteratura infantil, ente los que destaquen Cartes nel horru (y delles hestories más) y Nes ruines de la nueche y les hores. Como escritor algamó premios como’l María Xosefa Canellada de lliteratura infantil y xuvenil, el Fernán Coronas de poesía o’l Pepe Campo de monólogu, ente otros. Fundó la ONG Iniciativa pol Asturianu y otres iniciatives siempres col asturianu como llingua vehicular, ente les que destaquen la revista Formientu o la plataforma PlayPresta. Dende 2022 ye miembru de númberu de l’Academia de la Llingua Asturiana.
Llistáu de ganadores del Premiu Pepe Campo
| Edición | Ganador/a | Títulu |
|---|---|---|
| 2004 | Ermu | |
| 2005 | José Antonio de Dios | Mio güelu ye un top-model |
| 2006 | Inaciu Galán y González & Isaac García de l’Arada | Los asturianos al volante |
| 2007 | Benxa Pérez | L’home y la gochería |
| 2008 | Inaciu Galán y González | Les vacaciones |
| 2009 | Carlos Alba «Cellero» | Medio analfabetu |
| 2010 | Inaciu Galán y González | La mio fía cásase |
| 2011 | Carlos Alba «Cellero» | La llei del cuchu |
| 2012 | Jose Manuel Reguero López El Maestru | Un fallu tienlu cualquiera |
| 2013 | Inaciu Galán y González | Yá llegó la Navidá |
| 2014 | José Alfonso González Castellanos | Que me despierten dientro un sieglu |
| 2015 | Carlos Alba «Cellero» | Emprendamos de la crisis |
| 2016 | Inaciu Galán y González | Les coses de la política nueva |
| 2017 | José Alfonso González Castellanos | La Constitucionona |
| 2018 | Inaciu Galán y González | Viaxar n’avión |
| 2019 | Manuel Reguero “El Maestru” y Mención Especial escolar a ”La Feriona de Xixón” de Miguel Ángel, alumnu del CRA José Antonio Robles. | Maldita xubilación |
| 2020 | Canceláu pol andanciu de coronavirus | |
| 2021 | Aymara González Montoto | Somos unes repunantes |
| 2022 | Inaciu Galán y González | Nel tiempu l’andanciu |
