El martes que vien, 31 de mayu, va presentase’l llibru 50 años cola güeyada del neñu, del dibuxante y pedagogu Francesco Tonucci «Frato». Xunto al autor van tar tamién los traductores al asturianu de la obra: el Presidente de l’Academia de la Llingua Asturiana, Xosé Antón González Riaño, y el Director del Departamentu de Ciencies de la Educación de la Universidá d’Uviéu, Alejandro Rodríguez Martín.
Los trés pedagogos van falar, ente otres coses, de la contribución educativa universal de Frato, de la trescendencia d’esta obra traducida yá a munches llingües y del trabayu d’ellaboración de la so versión asturiana.
L’actu va desendolcase nel Salón de la Biblioteca d’Asturies «Ramón Pérez de Ayala» (El Fontán, Uviéu) dende les 12 del meudía. Les persones interesaes n’acutar un sitiu puen facelo llamando (985211837) o escribiendo un corréu lletrónicu a l’Academia de la Llingua Asturiana (alla@academiadelallingua.com)
