Esti sábadu l’Asociación d’Escritores d’Asturies celebró la so Xunta Xeneral de socios nel Muséu Arqueolóxicu d’Asturies. Na mesma aprobóse una propuesta de modificacion de los estatutos presentada pol periodista y escritor Inaciu Galán pola que la entidá asume como llingües oficiales de la organización, en plena igualdá, asturianu, gallego-asturianu y castellán, cola siguiente redacción:
ARTÍCULU 5.- L’Asociación d’Escritores d’Asturies tien como llingües oficiales na so actividá interna y esterna’l castellán, l’asturianu y el gallego-asturianu. La entidá va trabayar por da-yos una presencia digna a toes elles, promoviendo con especial procuru la difusión y l’usu de les llingües propies d’Asturies na comunicación de l’asociación y nel ámbitu lliterariu y cultural, ensin que seya torga da-yos abellugu tamién a actividaes n’otres llingües, afalando’l multillingüismu y el respetu a la diversidá cultural.
La propuesta aprobóse por unanimidá.
Xunto a esta propuesta aprobóse tamién que los Estatutos de la entidá tengan formatu billingüe (asturianu y castellán), incluyendo la toponimia oficial nes actividaes de la organización y que la entidá pase a tener de forma oficial el nome doble, n’asturianu y en castellán (Asociación d’Escritores d’Asturies/Asociación de Escritores de Asturias), un elementu de gran visibilidá ya importancia simbólica.
La Xunta Xeneral volvió a escoyer como presidenta a la escritora María Esther García, ya incluyendo a nuevos escritores y traductores n’asturianu, como ye’l casu d’Inaciu Galán y Victor Suárez, nuevos ayalgueru y secretariu, respectivamente, de la entidá que representa a los y les escritores d’Asturies. Tán tamién na nueva directiva Ángel García Prieto, Mirta Chamorro Mielke, Julia Urdiales, J. Marce García, Román Álvarez y Ana García de Loza.
