Esti vienres 21 d’avientu a les 19:30 hores va celebrase la presentación del llibru Carlos Ciaño (1855-1925). Ente Cuba y Asturies de Lluis Portal Hevia. Nel actu van intervenir, amás del autor, l’hestoriador Senén Rivero y Esther Prieto, d’Ediciones Trabe. L’actu va celebrase na Casa de los Hevia, allugada na cai Caveda y Nava, 31 de Villaviciosa.
EL LLIBRU
Carlos Ciaño (Villaviciosa, 1855-L’Habana, 1925) foi un escritor y periodista de gran sonadía en Cuba, pero malapenes alcordáu o reconocíu n’Asturies. Autor de dellos llibros (Tipos y topos, 1886; Cantares, 1888; El Castillo de Yuros, 1893), xunta’l so hermanu Álvaro publica De Asturias (1900), recopilación de cuentos de la tradición popular escritos n’asturianu o billingües. Póstumemente salió la edición de Costumbres tradicionales asturianas (1925). Lluis Portal escazipla a la busca d’información d’esti maliayés universal y con ella fainos esti rellatu sobre l’autor, el so tiempo y la so obra.
L’AUTOR
Lluis Portal Hevia (Villaviciosa, 1954), llicenciáu en Filoloxía Hispánica, ye escritor, periodista y estudiosu de la lliteratura asturiana. Ganador en 2011 del Premiu d’Ensayu «Máximo Fuertes Acebedo» cola obra Cipriano Folgueras, una gloria d’Asturies (2012), tien publicaos llibros de distinta factura: etnográficos (Secretos de Pandenes, 2006), biográficos (Francisco Balbín de Villaverde (Xiquín de Villaviciosa), 1995), les noveles xuveniles Pelegrinos del abismu (2010) y El club de los valientes, coles que ganó los premios de Llectures pa Rapazos de l’Academia de la Llingua Asturiana y Asturnews de Lliteratura Infantil y Xuvenil, entrambos los dos nel 2009. Nos años 2007 y 2008 fíxose col Premiu Uviéu de Teatru coles obres Oh 36! y Poison. Como escritor, dio a estampa nel 1991 un volume de cuentos tituláu Trófimo y Radamés.
