Saltadera Ediciones ta acabante poner nes llibreríes Todo a cien, un llibru nel qu’apaecen glosaes por él mesmu (cunta la hestoria de cada cantar, si se grabó y cuándo y otros datos d’interés), un centenar de les sos lletres, n’asturianu (la mayor parte) y castellán, onde dexa ver la so capacidá pa captar y reproducir la llingua viva de la cai y pa reflexonar sobre l’actualidá en composiciones brillantes y fresques, apegadiegues.
Miembru fundador, nos años ochenta del sieglu XX, del míticu grupu d’agro-rock asturianu Los Berrones, Tante Blanco ta mui vinculáu al mundu de la música, onde ye conocíu como guitarrista y compositor. Depués de dexar aquella banda en 2005 escomencipia l’aventura musical en solitariu, editando col nome Stroza, BerronStones y Tante Blanco y The Parabeles Conexión. Solu o acompañáu, a Tante Blanco tíra-y el llabor de lletrista, dexando na memoria colectiva d’Asturies parte del so repertoriu, frases afortunaes, estribillos o cantares enteros.
L’AUTOR
Tante Blanco (Tolivia, Llaviana, 1957), mineru retiráu, estudió na Universidá Llaboral de Xixón y entamó estudios de filoloxía na Universidá d’Uviéu. En 1998 espublizó’l llibru de cuentos Hestories piquiñines. Cola TPA (Televisión Pública d’Asturies) collaboró nos inicios de la cadena con monólogos n’asturianu, dientro del programa Al Aldu: la risión. Nesti momentu, amás del llabor musical que sigue desendolcando, prepara un nuevu llibru que va titulase Memories d’un xateru.
Un cantar de Todo a cien, de Tante Blanco
Trabayes nun taburdiu,
llámente travestí,
pa to padre tas perdíu,
ye lo que la xente diz.
Tovía yeres tan piquiñu
como’l curchu un garrafón,
querís más los cocinetes
que dir a xugar al balón.
Nun xugabes a los mélicos
como’l to primu Xuacón.
En tola parroquia
yá llamabes l’atención.
Nun yes tu, nun yes,
nun yes tu, qué vas a ser.
Presumís de ser buen muzu
y agora yes una muyer.
Fixístite un guah.e grande,
yá yeres un rapazón,
un día punxisti unes sayes
y zapatos de tacón.
Andes fechu una llaceria
caleyando per Xixón,
cola cara entafarrá
y enseñando’l corveyón.
Nun yes tu, nun yes,
nun yes tu, qué vas a ser.
Presumís de ser buen muzu
y agora yes una muyer.
Yá nun tienes pelo en pechu
dempués de la operación,
pues creciéronte les tetes
y aclariósete la voz.
Si volvieres pel to pueblu,
nun puen ver un maricón.
Si t’acolumbren de cerca,
van date con un rachón.
Nun yes tu, nun yes,
nun yes tu, qué vas a ser.
Presumís de ser buen muzu
y agora yes una muyer.
Y agora yes, agora yes
¡una muyer!
