Esti sábadu 20 d’abril, a los 93 años, morría tres una llarga vida que dexa atrás una inmensa obra n’asturianu, l’escritor mierense Julián Burgos Pasucal. L’autor ye quiciabes l’últimu d’una xeneración, los qu’escribieron nel tiempu del Franquismu y trabayaron pol idioma nun tiempu difícil.
Julián Burgos ñació ne Mieres del Camín l’1 d’abril de 1926. Doctoráu en Ciencies Económiques y profesional lliberal, dedicó’l so llabor lliterariu al xéneru humorísticu, al traviés del monólogu y la poesía. Formó parte, nos años sesenta del sieglu pasáu, de l’asociación Amigos del Bable, xunto a José León Delestal o Llorienzu Novo Mier, ente otros autores.
Nel so llabor pola llingua asturiana destaca tamién un ficheru nel que s’inclúin más de 150.000 términos n’asturianu, un refraneru con más de 200 fábules n’asturianu, asina como los sos estudios sobre la obra del poeta mierense Teodoro Cuesta. Nel campu lliterariu, llegó a escribir más de 6.500 monólogos, dellos recoyíos nos volúmenes ‘Hailos’, ‘Humor en bable’ y ‘Afayu del Nueu Mundiu”, el monólogu más estensu escritu en llingua asturiana, con más de 5.300 versos.
A lo llargo de la so vida ganó dellos premios lliterarios ente los que destaquen el Teodoro Cuesta de Mieres en 1978, l’Emilio Alarcos Llorach otorgáu pol Aula de Paz ‘Camín de Mieres’ en 2001 y el Premiu «Urogallo de Bronce» del Centru Asturianu de Madrid na categoría de llingua asturiana en 1992.
Los sos vecinos tamién lu reconocieron otorgándo-y en 2014 la insinia d’oru de los gallardones Miereneses del Añu. El 20 de xunu del 2018 L’Asociación Cultural «Camín de Mieres» fíxo-y un prestosu actu d’homenaxe como reconocencia a tola so trayectoria personal y profesional, y va pocos díes recibía un nuevu homenaxe del Concursu y Muestra de Folclor Ciudá d’Uviéu.
