Xaime Martínez, autor que remana na so obra asturianu y castellán y qu’asoleyó parte de la so obra na revista Formientu, ta acabante facese col Premiu Nacional de Poesía Moza 2019 pola so obra «Cuerpos perdidos en las morgues. Una novela de detectives». El xuráu valoró “la intelixencia poética manifiesta nel usu ficcional de la poesía, amás d’una fascinante capacidá para proponer una llectura innovadora del poema”.
El xuráu del Premiu Nacional de Poesía, axuntáu güei nel Ministeriu de Cultura y Deporte, propunxo a Xaime Martínez con esti gallardón dotáu con 20.000 euros.
Xaime Martínez Menéndez (Uviéu, 1993) ye graduáu en Filoloxía y anguaño realiza estudios de doctoráu na Universidá d’Uviéu. Ye autor de los poemarios Fuego cruzado (2014), col que ganó’l XVII Premiu de Poesía Moza ‘Antonio Carvajal’ y Hibernia (2017), esti postreru escritu n’asturianu. Participó na trescripción del llibru «Principios organizativos del patarrealismo salvaje» (2016), robláu col heterónimu colectivu de ‘Rinoceronte García’. Forma parte del grupu musical La Bande, con quien asoleyó los discos «La llamada del hombre ciervo» (2015) y «Un cadáver exquisito» (2016). En solitariu asoleyó’l llibru-discu ‘Ósculos d’agua nel Imperiu Asturianu’.
Tamién ye coeditor de la revista dixital Oculta Lit y collaboró n’espublizaciones como PlayGround, Tentaciones, Rolling Stone, Anáfora o La Nueva España, onde fixo una sección n’asturianu dedicada a los escolinos.
Xuráu
El xuráu tuvo presidíu por Begoña Cueto Prada, sodirectora xeneral de Promoción del Llibru, la Llectura y les Lletres. Como vocales tuvieron presentes Helena González Fernández, pola Real Academia Galega; Koldobika Josu Bijuesca Basterretxea, pola Real Academia de la Llingua Vasca/Euskaltzaindia; Vicenç Llorca i Berrocal, pol Institut d’Estudis Catalans; Nuria Barrio Fernández, pola Asociación Colexal d’Escritores (ACE); María Consuelo Candel Vila, pola Asociación Española de Críticos Literarios; Antonio Lucas Herrero, pola Federación de Asociaciones de Periodistas de España (FAPE); María do Cebreiro Rábade Villar, pola Conferencia de Rectores de les Universidaes Españoles (CRUE); Rosa María Aradra Sánchez, pel Centru d’Estudios de Xéneru de la UNED; Vicente Valero Marí, designáu pol Ministru de Cultura y Deporte; y Berta García Faet, autora gallardonada nel añu 2018.
