Güei, miércoles 6 de payares a les 20:00 hores, va presentase’l poemariu «Ritanes, ñerbates y otros cantos al pasáu» d’Armando Vega. Va celebrase na Llibrería La Buena Letra de Xixón (Cai Casimiro Velasco, 12).
Participen, amás del autor, l’escritor Miguel Rojo y Esther Prieto, Ediciones Trabe.
Ritanes, ñerbates y otros cantos al pasáu aúne composiciones de distinta factura nes que predomina’l poema curtiu, pero también dangunu de más llargor, correlatu perfechu de la memoria. Porque de memoria falen estos versos, de la memoria caltenida de la infancia perdida, del tiempu pasáu nun mundu que yá nun esiste. El qu’agora escribe yá nun ye’l nenu que foi hai tanto nun mundu rural aseñoriáu de ritanes, ñerbates y otres güelgues que lleguen hasta nós al traviés de la señardá de lo perdío. Escritu nun asturianu apegáu a la oralidá, estráu de dialectalismos orientales bien guapos y naturales, esti nuevu poemariu d’Armando Vega (col que ganó’l Premiu de Poesía «Nené Losada Rico» que convoca l’ayuntamientu de Valdés nel 2017) vien a sumase a la poesía de la pérdida (de la inocencia, de la infancia, d’un mundu y una forma de vida) pero también (y por ello) a la de la so recuperación al traviés de la palabra escrita «a sílabes cuntaes».
Armando Vega Rodríguez (Les Cuerries, Espinaréu, Piloña, 1961) desenrolla’l so llabor d’artista multidisciplinar en Xixón, con xeres qu’abarquen dende la fotografía a la escultura, pasando –que ye lo que más nos interesa– pela poesía. Escritor billingüe asturianu-castellanu, tien dos poemarios publicaos, Pente’l borrín de la memoria (2005) y Les hores escrites/Las horas escritas (2011). Incluyíu en dos antoloxíes poétiques (Asturcones. 31 poetas asturianos, 2013 y Contra’l silenciu, 2014), colaboró en distintes revistes lliteraries como Literastur, Reciella Malory, Voces, Prímula…
