El vecín de Xixón Xuan Miyar Martínez, de 69 años, resultó ganador del concursu de relatos pa persones mayores sobre’l procesu d’avieyar o vivir en soledá convocáu pola Federación Asturiana de Conceyos (FACC). Xuan Miyar ye activista llingüísticu y collaborador habitual de medios con collaboraciones lliteraries n’asturianu.
El segundu premiu recayó en María del Pilar Ortiz, de 67 años y vecina de Piloña; mientres el tercer premiu foi llográu por Juan Muñoz González, tamién de 69 años y vecín de Xixón. Al certame allegaron 50 rellatos.
El xuráu aconceyó de forma presencial y telemáticamente’l llunes, 4 d’abril, integráu pola alcaldesa de Tapia y Coordinadora de la Comisión de Comisión Servicio Sociales de FACC, Ana Vigón Suárez; el Director Xeneral de Servicios Sociales y Mayores, Joaquín Monteagudo Abeyaderos; la presidenta de l’Asociación d’Escritoras d’Asturies, Esther García López; la maestra y escritora Rosa Serdio González; y Rafael Cofiño Fernández, exdirector Xeneral de Salú Pública, espertu en salú comuñal y poeta.
El rellatu ganador del certame, tituláu ‘El pigazu’ y escritu n’asturianu, céntrase nuna escena cotidiana d’un home que, mientres paez apigazar énte la televisión, remembra los tiempos de la so mocedá cola que ye la so muyer y que lu ta mirando. El segundu premiu, ‘La tierra habitada’, céntrase nel tresformamientu vital de la protagonista a lo llargo de los años; mientres que’l terceru, ‘Boceto para un autorretrato’, básase na contraposición del pasáu y del presente na vida del autor col agua como filu argumental.
El rellatu ganador tien un premiu de 500 €; el segundu, de 300 €; y el terceru, de 200 €. Amás, van ser editaos y adaptaos audiovisualmente. L’actu d’entrega d’estos premios ta previstu que se celebre a primeros de mayu.
La FACC convocó’l pasáu avientu esti concursu de rellatos de ficción o autobiográficos pa persones mayores de 65 años residentes n’Asturies. La so temática había ser el procesu d’avieyar o vivir en soledá. La convocatoria contempló la posibilidá de presentar les obres tamién en versión audiu o vídeu pa facilitar la participación de quien nun usaren ordenador. Esta iniciativa ta enmarcada dientro del proyectu ‘Nun me llames soledá’ realizáu en collaboración de la Conseyería de Salú y que tien como oxetivu favorecer l’avieyamientu activu y facer visible les situaciones de soledá qu’afecten a numberoses persones mayores n’Asturies.
