El filólogu y codirector de Formientu, Diego Solís, fíxose col Premiu Asturies Xoven de poesía qu’otorga l’Institutu Asturianu de la Mocedá, na so edición de 2018. El so poemariu, qu’axunta poemes n’asturianu y en castellán, titúlase “Cállanos con esa música”. Solís mostróse emocionáu al conocer la noticia «sigo cuasi qu’ensin creelo», esplicó.
L’autor xixonés dixo tar «contentu, amás, porque se premie la mio poesía que combina tanto’l castellán como l’asturianu, idioma qu’a nivel cultural n’Asturies ta al empar del castellán y asina lo amuesen premios como esti», afirmó.
Diego Solís (Xixón, 1991) ye graduáu en Llingua Española y les sos Lliteratures pola Universidá d’Uviéu y tituláu pol Máster n’Estudios Avanzaos en Lliteratura Española ya Hispanoamericana pola Universitat de Barcelona, anguaño ta faciendo’l Máster de Profesoráu na especialidá d’asturianu.
Foi unu de los promotores del movimientu cultural xixonés Fame Poétika y dende 2017 ye codirector de la revista Formientu, asina como copresentador, xunto a la tamién escritora Laura Marcos, del programa lliterariu ‘La cla invisible’ de la canal de youtubers PlayPresta.
