La Dirección Xeneral de Política Llingüística, en comuña col Conceyu Valdés, ta acabante d’anunciar la xornada cultural que se va desendolcar mientres el día 17 d’avientu na Casa de Cultura de L.luarca.
Esta xornada, qu’entama a les 10:00 hores, ta dividida en dos sesiones: una pela mañana y otra pela tarde. Mientres la mañana van llevase a cabu delles ponencies: Antón Garcia va impartir la charra Hyakunin Isshu y otres traducciones del xaponés al castellanu de Fernán-Coronas; Adrián Martínez Expósito va falar sobre les Nueves traducciones y poemes xaponeses de Fernán-Coronas n’asturianu ya Ignacio Rodríguez Somovilla fadrá una la comunicación Baxo la cerezal en flor nun esiste la palabra estranxeru: pelos xardinos del padre Galo.
Tres una posa pa la xinta, pela tarde va arrancar la charra-taller Taza de haikus, impartida por Alicia Andrés Ramos. Trátase d’un percorríu pelos caminos del té y del haiku al traviés de la llectura y escritura d’estos poemes y d’una muestra de los aspectos esenciales de la ceremonia del té.
Les comunicaciones de la mañana son abiertes al públicu, mientres que la charra-taller de la tarde tien aforu limitáu a 20 persones y hai qu’acutar mandando un corréu colos datos personales a dxpoliticallinguistica@asturias.org enantes del día 15 d’avientu.
