L’Asociación d’Escritores d’Asturies presenta güei, martes 22 de setiembre, el llibru colectivu Primavera eterna 2020, que nun pudo presentase en primavera pola mor del confinamientu sanitariu del coronavirus.
Dieciocho el autores, n’asturianu y en castellán, xúntense nesti segundu volume de Primavera eterna pa, según espliquen nel entamu del llibru «con tinta, aplaudir a quien se bate’l cobre por nós nes cais, pa espidir un billete a otru llugar, quiciabes meyor qu’aquel nel que la so propia realidá-y retién, pal llector; pa romper de dalguna manera’l gruesu cristal del confinamientu y regalar un pedacín de primavera a tou aquel que s’avere a estes llinies». Ente los autores tán Esther García, José Ángel Gayol, Inaciu Galán, Aurelio González Ovies, Nieves Viesca, Mercedes García Amado o David Fueyo, ente otros.
La presentación va celebrase na Cafebrería «Fuentes en Asturias», asitiada na cai Bermúdez de Castro, 13, n’Uviéu, de magar les 19 hores. L’actu van presentalu Esther García, Presidente de l’Asociación d’Escritores d’Asturies, y los escritores David Fueyo y Aurelio González Ovies.
