La Sociedá Popular La Regalina de Cadavéu, del conceyu Valdés, convoca’l XXVII Premiu de Poesía «Fernán Coronas» (Padre Galo), al que podrán presentase toles persones que nun ganaran el premiu n’ediciones anteriores, con un poemariu compuestu por poemes inéditos, orixinales, escritos en llingua asturiana (nun puen ser tornes d’otres llingües) y con un mínimu de 275 versos.
La presentación pue facese pel corréu lletrónicu, unviando enantes del día 31 de xunetu los poemarios en formatu Word o PDF a splaregalina@gmail.com Los trabayos dirán encabezaos por un títulu y firmaos namás con un nomatu.
Nel corréu lletrónicu axuntaráse un archivu aparte, que la organización (Sociedá Popular La Regalina) guradará en secretu, ensin que’l xuráu pueda conocelu enantes del fallu, colos datos siguientes: nome, teléfonu, señes, DNI y títulos presentaos al concursu.
Concederáse un únicu premiu de 900 euros, contemplándose al mesmu tiempu la so publicación. El Xuráu nun podrá declarar ermu el premiu y el so fallu nun se pue retrucar. Del resultáu darase anuncia nun actu públicu en Cadavéu, el día 7 d ́agostu, aniversariu del nacimientu del Padre Galo.
El premiu tien esti añu’l patrociniu del agospiu turísticu La Reserva de los Campos, asitiáu en Cadavéu.
