Nunca nun te vi
nunca nun te conocí.
Solo yes
baldrayos na borrina l’alcorzanza.
Solo yes
esa persona sorriente,
moza en blancu y negru nes semeyes,
semeyes arrequexaes en caxones.
Solo yes recuerdos, hestories na memoria,
solo unos vistíos decoloríos
nel armariu escaecíu.
Solo yes
la madre de mio familia,
la qu’usaba los carambelos
pa endulciar la murnia.
¿Solo yes?
Creerán qu’esmoreciesti na tierra,
cuando yes l’aire de casa,
l’arume nes tos ropes, manteles, fotos…
Por eso,
cuando yo visto eses ropes,
esa chaqueta vieya grandona,
esi h.arsé gordón de llana,
siento qu’anque nun te conocí,
quiérote,
y quiesme,
que,
cuando visto la to zamarra
tas abrazándome,
con esi abrazu que nun recuerdo,
y que’l to arume adolza la vida
como los tos carambelos.
