Güei fai 35 años de la muerte del escritor, campesín y activista Andrés Solar (1955-1984). Coincidiendo con esta fecha y como homenaxe, en Formientu asoleyamos dos poemes de Raúl Alonso (Xixón, 1999), estudiante del Grau d’Hestoria na Universidá d’Uviéu que tien nes llibreríes el so primer poemariu «Los días vividos» (Ediciones Camelot), nel qu’apaecen dellos poemes n’asturianu. Los qu’asoleyamos güei son dos inéditos, dedicaos a l’alcordanza del poeta de Deva.
Yera la mar ya l’orbayu
caún de los tos güeyos,
yéremos les foles
qu’una vegada más
mecen los nuesos cuerpos
nuna torbonada.
Yera una muyer
camentando na mar
garrar voz
y glayar cola sorrisa
que l’orbayu ye l’orixe
d’esti pequeñu país.
—
Yera un pueblu escontra’l vientu,
escontra les llamaraes del estáu represor,
escontra l’olvidu de la xente,
escontra les llárimes de les que nun escaecen.
Intentaba amosar que yera una nación
y viaxaba ente solombres
lluchando pola so llibertá,
pero enxamás consiguiera ser llibre.
Namái quedaben les voces
qu’algamaben a glayar quiciabes dalguna pallabra
mentanto intentaben nun afogase na inmensidá.
Namái quedaba na nueche orpín y silenciu.
Y yo, que quería ver esti pueblu llibre,
quixi sacalo y non añalo na muerte.
Yo, que namái podia glayar,
glaye al vientu que queríemos llibertá.
