El presidente de l’Academia de la Llingua Asturiana, Xosé Antón González Riaño, ta acabante ser reconocíu col Urogallo de Bronce na estaya de Llingua Asturiana. Ñacíu en Viella (Siero), en 1956, Riaño ye maestru, pedagogu y Profesor Titular de la Universidá d’Uviéu, institución na que se doctoró en 1993 con una tesis sobre la interferencia llingüística escolar ente l’asturianu y el castellanu -investigación qu’algamó’l Premiu Estraordinariu de Doctoráu-, anguaño imparte docencia nel Departamentu de Ciencies de la Educación y ye Presidente de l’ALLA dende xunu de 2017. A lo llargo de les caberes cuatro décades vien implicándose de forma fonda nel llabor pol asturianu, n’especial nel ámbitu educativu, nel que les sos espublizaciones sobre didáctica y pedagoxía son refencia.
El Centru Asturianu de Madrid convoca dende l’añu 1986 los Premios Urogallo de Bronce pa reconocer la figura d’asturianos que destaquen nel so llabor n’estremaes estayes sociales y culturales. Ente les categoríes d’estos premios, que s’entreguen cada branu na Feria Muestres d’Asturies, en Xixón, tán artesanía, baille, tonada, corales, gaita, gastronomía, personaxe popular, defensa de la natura, deporte y otros especiales.
Una de les categoríes con más sonadía ye la dedicada a la Llingua Asturiana, cola que se tien reconocío a la trayectoria de compromisu col idioma en distintes estayes, y tuvo con gallardonaos a figures como Mánfer de la Llera, María Xosefa Canellada, Ana Cano, Xuan Xosé Sánchez Vicente, Vanessa Gutiérrez, Inaciu Galán, Xosé Lluis García Arias, Esther García o Berta Piñán, ente otros.
Llistáu de Premiaos (1986-2019)
1986 Mª Xosefa Canellada
1987 Xosé Lluis García Arias
1988 Jesús Neira
1989 Llorienzu Novo Mier
1990 Xosé Álvarez
1991 Luis Aurelio Álvarez
1992 Julián Burgos
1993 Florina Alías
1994 Roberto González-Quevedo
1995 Lluis Xabel Álvarez “Texuca”
1996 Ediciones Trabe
1997 Albino Suárez
1998 Mánfer de la Llera
1999 Ramón d’Andrés
2000 Nené Losada Rico
2001 Academia de la Llingua Asturiana
2002 Dolores Sánchez “La Galana”
2003 Ana María Cano González
2004 Pablo Xuan Manzano Rodríguez
2005 Milio’l del Nido
2006 Mª Esther García López
2007 Berta Piñán
2008 Xuan Bello
2009 Mariluz Pontón y José Sariego
2010 Miguel Solís Santos
2011 Próspero Morán López
2012 Inaciu Galán y González
2013 Marisa López Diz
2014 Ana Vanessa Gutiérrez
2015 Pablo Suárez
2016 Humberto Gonzali
2017 Xuan Xosé Sánchez Vicente
2018 Carlos Alba “Cellero”
2019 Xosé Antón González Riaño
