Aurelio González Ovies ta acabante ser reconocíu col Urogallo de Bronce de Llingua Asturiana del Centru Asturianu de Madrid. Ñacíu en Bañugues en 1964, Ovies ye poeta, articulista, estudiosu de la lliteratura y profesor de la Universidá d’Uviéu. La so obra, mayoritariamente en castellán, llevólu a algamar dellos premios dientro y fuera d’Asturies, tien delles obres de gran interés y bien sofitando la presencia del asturianu n’ámbitos lliterarios y universitarios.
En 2018, l’Asociación d’Escritores d’Asturies concéde-y el XIII Premiu de les Lletres d’Asturies pola so trayectoria lliteraria, xustificao nes pallabres d’Esther García, presidenta de l’AEA: «Aurelio ye’l poeta del amor, amor a tolo que lu arrodia, amor sentíu nuna poesía duce y clara, enllena de llirismu y d’imáxenes intenses, onde tán presentes tolos arumes y sabores de la nuesa tierra, de la so tierra natal, onde la mar y el paisaxe y el so propiu mapa interior, son referentes constantes na so obra. La so voz ye en sí guapura y lluz».
Los Premios Urogallo de Bronce convócalos el Centru Asturianu de Madrid dende l’añu 1986 pa reconocer la figura d’asturianos que destaquen nel so llabor n’estremaes estayes sociales y culturales. Ente les categoríes tán artesanía, baille, tonada, corales, gaita, gastronomía, personaxe popular, llingua asturiana, defensa de la natura, deporte y otros especiales. El premiu dedicáu a la llingua asturiana tien un especial valir por ser el más prestixosu d’ente los que s’entreguen al llabor pol idioma fuera de los gallardones puramente lliterarios.
Esti añu, y fuera de la categoría, como premiu especial con mención honorífica, vuelven a reconocer el llabor d’Esther García López, escritora n’asturianu, miembru de l’Academia de la Llingua Asturiana y presidenta de l’Asociación d’Escritores d’Asturies. Esti premiu entrégase nun actu específicu fuera de les categoríes xenerales.
Llistáu de ganadores
1986 Mª Josefa Canellada
1987 Xosé Lluis García Arias
1988 Jesús Neira
1989 Llorienzu Novo Mier
1990 Xosé Álvarez
1991 Luis Aurelio Álvarez
1992 Julián Burgos
1993 Florina Alías
1994 Roberto González-Quevedo
1995 Lluis Xabel Álvarez “Texuca”
1996 Ediciones Trabe
1997 Albino Suárez
1998 Mánfer de la Llera
1999 Ramón d’Andrés
2000 Nené Losada Rico
2001 Academia de la Llingua Asturiana
2002 Dolores Sánchez “La Galana”
2003 Ana María Cano González
2004 Pablo Xuan Manzano Rodríguez
2005 Milio’l del Nido
2006 Mª Esther García López
2007 Berta Piñán
2008 Xuan Bello
2009 Mariluz Pontón y José Sariego
2010 Miguel Solís Santos
2011 Próspero Morán López
2012 Inaciu Galán
2013 Marisa López Diz
2014 Ana Vanessa Gutiérrez
2015 Pablo Súarez
2016 Humberto Gonzali
2017 Xuan Xosé Sánchez Vicente
2018 Carlos Alba “Cellero”
2019 Xosé Antón González Riaño
2020 [Nun se celebró por causa del covid-19]
2021 Xulio Viejo
2022 Aurelio González Ovies
