L’espaciu d’Iniciativa pol Asturianu de la FIDMA 2019, nel que, ente otres empreses, tán les editoriales Trabe y Saltadera ta acoyendo tolos díes presentaciones y firmes d’obres actuales n’asturianu. Esti vienres 16, dende les 17 hores, va tener llugar la presentación del poemariu Y el mundu marcha (Saltadera, 2019) de Diego Solís. L’espaciu ta nel Pabellón 3-Puestu 24.
El llibru
A partir del clásicu del cine mudu The Crowd (una película que desmitificó’l «suañu americanu», conocida ente nós col títulu Y el mundo marcha), Diego Solís constrúi un llibru que, ensin renunciar al compromisu social, al sentimientu de desarraigu, al amor y al desamor, cuestiona los valores de la so xeneración; aquella que, na so opinión, teniéndolo too pa triunfar, camina pa contra’l fracasu, col éxodu como filu conductor. Los intertítulos de la película de King Vidor son les estayes qu’estructuren el llibru. Siguidor atentu del Surdimientu (cita a Piñán y a Texón), l’autot camuda la característica señaldá d’aquellos buscando perfacer una obra más directa, más urbana y vitalista, mientres que les referencies a la música o el cine ganen pesu: nun son un ecu, son parte del poema mesmu.
L’autor
Diego Solís (Xixón, 1991) ye graduáu y máster en Lliteratura Española y codirector de la revista Formientu. Tien publicaos reseñes y poemes nes revistes Formientu y Lliteratura. Ta acabantes ganar el premiu Asturies Xoven de Poesía 2018 con «Cállanos con esa música».
Un poema
Esi burrín, atáu a les afueres de Tazones,
miraba atristayáu a los coches que pasaben.
Alcuérdome que mio padre aparó’l coche
y dímos-y un trozu de pan. Yo yera pequeñu
pero nun se m’olvida cómo fuximos d’aquello
que encadenamos.
