L’espaciu d’Iniciativa pol Asturianu na Feria Internacional de Muestres d’Asturies 2019, nel que, ente otres empreses, ta la productora y editora Cuatro Gotes, ta acoyendo tolos díes presentaciones y firmes d’obres actuales n’asturianu. Esti vienres 16, dende les 19 hores, va tener llugar la presentación del númberu 17 de la revista de lliteratura moza n’asturianu Formientu nel citáu espaciu, que s’asitia nel Pabellón 3-Puestu 24.
La revista lliteraria Formientu, que sal en papel dende l’añu 2006 y ta codirixida polos escritores Diego Solís y Claudia Elena Menéndez, llega con un númberu nuevu, el 17, a les llibreríes d’Asturies y col oxetivu de siempres, dar visibilidá a los y les escritores mozos n’asturianu.
Un poema d’Irma González-Quevedo en Formientu 17
Na busca d’un desiertu invisible
al que suañamos tornar,
construyimos atayos
hacia’l llaberintu de la necesidá.
Aquellos árboles yá morrieron,
pero la so solombra ye la única casa que conoces.
La promesa namás vive un momentu.
Siéntola sorda y fría.
Una tentación aceda,
sola,
como la propia soledá.
La permanencia faise insalvable.
Pinchámonos colos güesos del atapecer,
que palpiten con rabia nel altu de montes afilaos
d’esi desiertu de xuventú. Esta vez nun lloraremos,
y cuando’l mundu enferme,
el silenciu sedrá más fuerte.
