Laura Marcos, que consiguió’l Premiu «Fernán-Coronas» 2019 col poemariu Díes otros, ta acabante poner nes llibreríes el que ye’l so primer poemariu, con Ediciones Trabe.
Ángeles Carbajal, autora del prólogu de Díes otros, fala d’esti poemariu como «poesía con pensamientu». Y esa ye la impresión que queda en nós de la que lleemos dalgún de los diecisiete poemes que conformen esta primer entrega poética de Laura Marcos: versos que van del cerebru a la mano que los escribe pasando de dides per onde habiten los sentimientos. Versos conteníos, concisos, definitorios, d’una engañosa cenciellez que, por embargu, acueyen elementos surrealistes y metáfores eficientes.
Dividíu en tres partes («La lluz robada», «L’agua turbio» y «El son cambiáu»), caúna d’elles incorpora la esperiencia de la pérdida y del desarraigu: el duelu, l’aceptación y l’adaptación. Cada parte va acompañada d’una ilustración de Mónica Jiménez.
Laura Marcos (Mieres del Camín, 1982), llicenciada en Filoloxía Inglesa pola Universidá d’Uviéu, ye narradora, poeta y traductora. Foi coordinadora del conseyu de redacción de Formientu. Nel 2017 publicó Cuentos de ser y de tar, que va yá pola segunda edición. Con Díes otros foi a ganar el Premiu de Poesía «Fernán-Coronas» na convocatoria del 2019.
