Escritu por Xandru Martino Ruz, Vincitur inimicus cunta la hestoria d’Alfonso II, a mediu ca-
mín ente la realidá y la ficción, al traviés de los güeyos de Pelayu, un monxu amanuense que conoz al rei nel so retiru n’Ablaña y recibe l’encargu d’escribir la so crónica. Una mirada enllena matices al rodiu del monarca, esmolecíu por afitar el poder d’Asturies énte l’amenaza sarracena o l’influxu de Carlomagnu.
Vincitur inimicus ye la segunda novela de Xandru Martino Ruz pa públicu adultu y la segunda qu’espubliza con Delallama Editorial. Nel 2020 asoleyó, tamién n’asturianu, la novela histórica Nunn, que narra la invasión romana d’Asturies y que foi un ésitu rotundu que sigue algamando llectores.
«Tanto la editorial como yo tamos mui contentos con Nunn, porque calculo que se vendieron unos 500 exemplares hasta agora, y vendelos nuna novela n’asturianu nun ye fácil», afirma l’autor, qu’espera la mesma acoyida, o meyor, pal so llibru nuevu. Tamién espera esfrutar más de les presentaciones, porque Nunn aportó nos primeros meses de la pandemia y cada actu yera «un drama».
L’escritor, con títulos como De Ceuta a Sarayevo (1995) o A la gueta l’esbardu (1997), ye llicenciáu en filoloxía francesa, diplomáu en maxisteriu y especialista d’asturianu pola Universidá d’Uviéu, amás d’académicu correspondiente de l’Academia de la Llingua Asturiana dende l’añu 2021.
