El pasáu sábadu 15 d’avientu celebróse na Escuela de Comerciu de la villa de Xovellanos el I concursu Xixón Fala en 3, una competición n’asturianu dafechu onde se presentaron temes, idees, investigaciones con munchu procuru y con bona calidá llingüística énte un públicu non especializao, xeneralista y variao.
Esti eventu ufrió a la ciudadanía una ocasión única pa perfeccionar les sos aptitúes de comunicación n’asturianu, pa emplegar l’idioma en cualesquier estaya y rexistru y pa participar nun eventu col que la Conceyalía d’Educación y Cultura ta buscando «algamar cotes altes de prestixu y normalización en tola comunidá asturfalante».
La entrega de premios va ser el 21 de Febreru de 2019, coincidiendo col Día Intercional del Idioma Maternu, pero yá se conocen los ganadores de les dos categoríes. Na Estaya A: dedicada a temes venceyaos a la cultura y la realidá asturiana, el ganador foi Pablo M. Testa, vecín de Bimenes, con “Ente lo animal y lo humano”. El segundu premiu foi Inaciu Galán, de Xixón, con “Muyeres na lliteratura asturiana”, quedando en tercer llugar Sergio Buelga, tamién xixonés, con “Desaniciu del términu teatru costumista referencia prexuiciosa pa contra’l teatru popular”.
Na Estaya B, dedicada a temes de divulgación xeneral, el primer premiu foi pa Claudia Lueje, de Cangues d’Onís, cola charra curtia “Esquí de monte”, el segundu premiu foi pa Rubén Magadán Cosío, de La Collá, Siero, con “Otru estáu del bienestar nun ye posible: una excepción nel capitalismu históricu”, quedando en tercer llugar Víctor Suárez Piñero, d’Uviéu, con “Wikipedia: ¿ta’l conocimientu llibre y multillingüe en peligru?”
El xuráu tuvo presidíu por Raquel Rodríguez Huergo, Directora de la Fundación Municipal de Cultura, Educación y Universidá Popular, y compuestu por Marta Mori d’Arriba, Vicepresidenta de l’Academia de la Llingua Asturiana, Ramón d’Andrés, profesor titular del Departamentu de Filoloxía Española de la Universidá d’Uviéu, Fernando Padilla Palicio, Director Xeneral de Planificación Llingüística y Normalización, Próspero Morán, periodista, que tamién fixo de presentador y Mª Xosé Rodríguez López, Responsable de la Oficina de Normalización Llingüística, qu’actuó como secretaria.
Tres emponderar «la calidá y bayura de los temes presentaos», el xuráu valoró tanto la calidá espositiva y la capacidá de síntesis como la calidá llingüística, la oratoria y la capacidá de comunicación de les persones participantes.
La Oficina de Normalización Llingüística de Xixón ufrió’l videu en directo na so páxina de facebook, onde ta colgáu agora.
