Supón que güei me busques
nel rincón onde
per primera vez
acubixaron, asustaos,
los nuesos cuerpos;
que tas sola
y grites el mio nome
que l’ecu
acalla’l ruxerrux de la nueche;
que dende una esquina,
el fueu te revela
una sombra
y que los mios llabios de fumu
respuenden con pallabres ardientes
a la to voz na roca;
qu’esta distancia,
qu’al to pesar y al mio pesar
sepártanos, desapaez
y, de sutrucu, tu y yo
tamos entregaes al amor;
que depués nos miramos
y la to sorrisa respuende
a la mio sorrisa satisfecha;
qu’entama alborecer
y contemplámosmos en silenciu;
que mañana cuando t’alloñes
alcuérdeste de min,
y que nunca, nunca enxamás,
volvemos a caminar soles,
dafechamente soles,
so la tierra.
