YÁ nun consuela la ñeve
y el tiempu de xugásela a la ruleta
rusa peles playes empuñar
la mar apertando
el so salitrosu fervor escontra la vidaya
los díes nos que descolgar un estintor y correr
haza l’horizonte intentando apagar
aquellos atapeceres descontrolaos Pero entrar na nueche
como nuna panadería arrasada
los faros de los coches que no alto
cruciaben el viaductu yeren les úniques
estrelles fugaces a les qu’entós se podía
pidir deseos: la mocedá ye una llingua
de declinaciones turbulentes
traxi l’aldu los gües
guardao nos zapatos pa nun dexar buelgues na escarcha.
LOS utres terminaron por
baxar foron rincando a tires
les solombres de los héroes: una brisa
abetunao ponía en llabios de les estatues
palabres de rendición
xiraben caudaloses les gaviluetes
esperando’l so turnu Al presentame
dexo na mano que me tienden un puñáu
de pisotiáu confeti recoyío nesa cai
pela qu’anueche crució la cabalgata
de reis, hai almanaques
enllenos de díes bisiestos antigües
cróniques onde se narra la doma
de los rinocerontes la conquista de los polígonos
Siempre llevo en bolsu dalgunos
peldaños colos que xuguetiar na cola’l cine Les foles
dexaben nes fiendes del cantil espluma
podre como carroña, l’arrepentimientu
ye otru d’esos privilexos a los que nun
tienen derechu los vencíos.
ESTRENCHÁBASE la ciudá, la tarde
diba yá quedando
ensin salides
cuando al cruciame contigo un cansanciu
aniñao fizo españar la to sorrisa
nun acoyedor bocéu. Y
d’un blincu
intenté fuxir al traviés de la to boca.
DELLES selmanes quédame’l martes mal
aparcáu pisando’l pasu cebra, o dexo’l miércoles
en doble fila y los pitíos de los taxistes
faen ullar rabiosos a los perros. La ñeve
ye un deceicionante champú. Amasar
el verde aguacientu de los azulexos nuna pulpa
desconcertante cola que facer torpes
malabarismos · la rabia del nailon
adomao, esi rancor. Como’l prometedor fubolista
que sintió’l cruxíu’l destierru naquella
lesión una mañana
d’entrenamientu: frañidura de tibia y pero non, yá
non. Picaportes deshidrataos,
la clorofila cásique o’l coche
patinando na lluz, el travelling grasientu d’una rabiosa
mediatarde de primavera sobre’l parabrises mientres
nel reflexu del retrovisor ye xueves
ye ochobre y amanez ferruñando’l fumo
de la churrería. Esta desolada
sensación de que magar concuerden les palabres
y encaxen les lletres la solución del crucigrama yera otra
bien distinta. Pero preferir yá
la derrota · la confortabilidá del fracasu.
FUERE una llucha
estraña, torpe, na que’l derrotáu fui
yo pero la que fuxó
foi ella · el roncu
reproche del ascensor, interminable, paeció baxala
a lo más fondo de la nueche.
Desperté tarde,
cola lluz abarullao yá
pel cuartu y revolviéndome incómdu
na cama: pente les sábanes
quedaren dalgunes de les sos penques; raspioses
como les faraguyes d’una cena desolada.
SUDU cauterizáu, la cama
desfecha como una carta enllena
reproches aburuyada y rancorosamente
allanciada escontra una esquina del cuartu.
L’ecu estartaláu del to nome
nes canteres, la ferocidá d’un cortauñes.
Como eses nueches nes qu’al volver a casa
alcuentro qu’escaecí prendida dalguna lluz
tol día, y siento esa confusa
desazón del visitante que se sabi
inoportunu. La cartilaxinosa collecha
de les aceres. Caliza
dentao, dexar cayer
nel sombreru d’esos mimos un puñáu
d’engranaxes como gastada calderilla: un chasquíu
de pieles y qu’en silenciu entamen a follar
arrincándose’l maquillaxe a mordigaños.
DE les estrelles quédome col so rinchíu
sobre la cal o zapatos na ventana un terceru
un cuartu la lluz infestao d’eses
fotos que nos quema los deos contaxándonos
una llepra alcalino’l cobre
aformigao tiestos persianes un nordés
arracimando’l marfil espoliada
calambriza contraprogramar la estúpida
serie qu’echen pel mio espeyu cada
mañana un quintu pisu un séptimu
un séptimu y entós yogur reseco
sobre la encimera tien tautu
de portazu la lluvia embanza nes llinies
de les mios manes porque
sarnoses porque ver unos zapatos
sacaos a la ventana siempre
me fai buscar sobre l’acera
un ridículu suicida en calcetinos.
PELES tardes yá sólo comer pipes o
mazcar esta borrina, ver desdibuxase
los maniquíes como xente que se pierde na distancia
y a la que salgo a despidir dende’l rompefoles.
Esta borrina que xube
de la parada soterránea del tren, que cañica
los columpios, qu rellena d’una carne blanco les bluses
nos tendales; que fai cruxir la salvia
del salgueru crispando baxo tierra los sos
raigaños como una amburiante mano qu’arraguña
una espalda. Punzantes estielles de la to piel
baxo les uñes. Yá sólo
aldovinar el crepúsculu nel silenciu fosforescente
sobre’l polideportivu, volver
pisando cáscares de pipes a la espera d’esa brisa
que revele otra vez una nueche de cielos
mal estrellaos · sentir un restallíu
allalantre. Y que la lluna
seya un tebiu casquiellu sobre les baldoses.
L’AUTOBÚS para
xunta un concesionariu y nel reflexu
de les cristaleres soi unu más
de los fotogrames d’una desasosegante
película. D’esmenu
una llugada de sol prende
l’escaparate y ardo
como nun infeicioso celuloide.
